SHILLONG: Sukrobar salo, West Garo Hills a·jani Deputy Commissioner Swapnil Tembe aro Tura Municipal Board (TMB)-ni Chief Executive Officer (CEO) Rikse R Marak-ni dilanichi, dingtang dingtang dolrang baksa tom·e chanchirimangenba, Tura jillani ramasamrango ma·manti bosturangko palengani a·sel re·ruraenggipa manderang neng·nikanirangko chagrongna nangtokengani gimin aro ramarang apchangket ong·atako man·engani gimin ramasamrango bostu palgiparangko Tura-ni biap dambriona apjitatskana manchie donangaha.
Ia tom·aniko Tura-ni DRDA conference hall-o ong·atangaha aro tom·anio dingtang dingtang area development committee-ni membor-rang, traders association-ni membor-rang, hawkers association-ni membor-rang aro West Garo Hills-ni police officer-rangba dongpae bak ra·angaha.
Ia tom·anio Tura jillani ramasamrango bostu palbadinge cha·enggipa manderangko dingtang biapona apjitatani bidingo chanchiangengon, Ringre-o donggipa Urban Hub, Araimile-o be·en palchakna rike on·gipa biap, Najing Bazar-ni bangbang ong·e dongenggipa biap aro Dakopgre-o donggipa Tura Housing Complex-ona apjitatskana manchie donangaha.
Iani bidingo, ramasamrango bostu palbadinge cha·enggipa manderangko re·baenggipa September 15 ba una skangan, Tura-ni DC office-ona re·ange, DRDA office-o an·tangtangko biming segatechina gita District Administration aro TMB-ni official-rang u·iataha.
Ia tom·anio, ma·manti bosturangni damrang tang·doengani a·sel ramram manderang neng·nikanirangko chagrongna nangtokengani gimin chanchirimangengon, badiaba badiaba dolni manderang, dokkan dakenggipa aro bading chiwale cha·enggipa manderangoniko tangka paisa gile ra·engani a·selsa bosturangni dam tang·doenga ine West Garo Hills a·jani Deputy Commissioner Swapnil Tembe parakatenba, iandakgipa dol ba manderangni dabie ra·anina tangka paisarangko on·jachina aro ta·raken police-rangna u·iatchina gita dokkan dakgiparangko aro bading chiwalgiparangko didiataha.
