SHILLONG: Hynniewtrep National Liberation Council (HNLC) bobil dolni sakbonga dilgiparang, ma·mong aro a·dok sorkari baksa agangrikaniko a·bachengatna gita a·dokona sokbaaha.
Ia sakbonga dilgiparangara, HNLC-ni vice chairman Manbhalang Jyrwa, political secretary Aristerwell Thongni aro foreign secretary Phrangkupar Diengdoh baksana uamangni sakgni personal security officer-rang, chong·motan Aiborlem Marbaniang aro Storgy Lyngdoh ong·a.
HNLC bobil dolni ku·baltitimgipa Sadon Blah-ni kobor ra·timgiparangna parakatani gitade, HNLC-ni dilgiparang, re·anggipa August 5 tarikon a·dokona sokbaaha aro uamang Sumer-o donggipa MeECL-ni inspection bungalow (IB)-o dongenga.
HNLC bobil dolni sakbonga dilgiparangko, sorkari baksa agangrikna gita re·anggipa August-ni 2 tarikon HNLC bobil dolni gita seoke donangaha ineba HNLC bobil dolna agangrikdilenggipa aro Hynniewtrep National Youth Front (HNYF)-ni president Sadon Blah parakataha.
Blah-ni aganani gitade, HNLC bobil dolni dilgiparang, adita salrangna skang, sorkarini ku·baltitimgipa Peter S Dkhar-koba grongaha.
Sorkari baksa agangrikna man·na gita Bangladesh a·songo ma·chakenggipa HNLC bobil dolni dilgiparangna, naljokgnigipa ramako ma·mong aro a·dok sorkari dolgnian on·angahachim.
