Niamgri koela bikotanina, TMC-ni dilgipa Dikkanchi, sorkariko matnange agana

SHILLONG: Mijal salni bako, Meghalaya TMC-ni dilgipa, Dikkanchi D Shira, NPP-chi chalaienggipa, MDA sorkariko matnange agana baksana niamgri koila bikotani aro me·chikrangna namgnirangko kam ka·ani gimin singdoaniko dakangaha.
Indake an·tangni constituency, Mahendraganj-o mande jinmana aganani dakengon, Shira MDA sorkari a·dokni namgnina mairangko dakaha, ine singdoangaha. Uni a·kange aganani gitade, niamgri koila bikotanirang, Meghalaya-o namen batrikrikengaha aro iani a·selan salantion ramram manderang an·tangtangni janggirangko gimaatna gita nangenga. Indiba iarangni gimin, Meghalaya Assembly-o singdoanirangko dakgenchimoba, Meghalaya sorkari tolgipa aganchakanirangko on·enga, ine ua aganangaha.
”Oko donggiparangna hospital-ko rikna gita, bilsi bongarangna skangan tangkarangko chamahachim, indba MDA sorkari da·oba kamrangko ka·na on·jaha. Gasubatgipade, Assembly-ni ningaode uamang kamrangko senggnangan ka·atgnok ine aganchakaha, indiba da·ona kingkingba maming kamrangko ka·na a·bachengkuja,” ine joltango donggipa oko bi·sa ke·gipa manderangna hospital-ko rikna miksonganirangko agane, ua bang·a ma·giparangan iani a·sel an·tangtangni janggirangko gimaataha, ine ua aganangaha.
”A·doko donggipa sakantian, sorkarini tolgipa ku·rachakanirangko gisik ra·gen aro ong·nasienggipa election-o manderangni dingtanganiko mesokanggen,” ine ua aganangkuaha.
Meghalaya a·doko niamgri koila bikotani aro garirango salanirangko champengna gita, a·dok sorkari rake kamrangko ka·enga ine agangenchimoba, a·doko niamgri koila bikotanirang batesa bang·batrikrikenga.
”Tangka paisarangko bang·e man·dapani pilakan, niamgri koilarangko bikote badingchiwalni a·sel ong·enga. Maidake truck garirangko uamang border-rango re·na gita on·enga? 2018-20 bilsiode truck gari ge·sao hajal 70,000 tangkarangkosan ra·aiachim, indiba da·ode sima ariko batsotna, lakh 1,10,000-rangko ra·enga. Ian kajina gamgiparangni tangkarangko kal·ake roani ong·a,” ine Rangsakona-ni TMC MLA, Zenith Sangma aganangaha.
”Niamgri koila bikotani a·sel ramram manderang an·tangtangni janggirangko gimaatna gita nangenga aro misilgipa kamrang iano bon·aija, niamgri bikotgipa koilarango sima ari bate ra·anganikoba dakenga. An·chingni mikkango indakgipa obostarang ong·enga, ian kratchana nangani ong·a, indiba MDA sorkari ia ong·a obostarangko jegalaniko dakenga,” ine ua aganangkuaha.