TURA: Re·anggipa Sukrobar salo, South Garo Hills a·jani Gasuapara-o donggipa nokdang ge·sako bon·pile wa·al kamgopahani a·sel ia nokdang neng·nikanirangko chagrongna nangengaha ine Gasuapara-ni Association for Democracy & Empowerment (ADE) dol parakatenba, iani bidingo ta·raken spot inquiry-ko dake duko ga·akenggipa nokdangna nanga gita dakchakanirangko on·china sorkariko didiataha.
ADE Gasuapara regional unit-ni president Callyneccan Sangma-ni u·iatani gitade, wa·al kama man·gipa nokara Jenori Marak minggipa me·chikni nokdang ong·achim aro wa·al kamani somoio nokni ma·gipa saksasan noko dongaiachim.
“Wa·al kamani somoio nokni pagipa, kamtangko ka·na ong·katange ua somoio nokni ma·gipa saksasan noko ong·aiachim. Ia nokdangni sepango donggipa nokba pagipani noksa ong·achim, jean mikron nikjae, andalgipa a·gilsako janggi tangenggipa gitasa ong·achim. Wa·al kamengmiting somoio samba jolo job card-ni kamko ka·enggipa manderang dakchakna jotton ka·ahachim indiba wa·alko kimitsrapjae, nokko bon·pile wa·al kamgopaha,” ine ADE Gasuapara unit-ni president parakataha.
Indake ong·engon, wa·al kamgopako man·gipa nokdang, kangal cholgri ong·pagipa nokdangsa ong·a ine Sangma parakatenba, ia a·selni bidingo ta·raken spot inquiry-ko dakchina aro ia nokdangna dakchakanirangko on·china Gasuapara block-ni block development officer-ko aro a·dok sorkariko didiataha.
