TURA: Tura-oni Paikan-ona dakanggipa NH-51 ramani bang·bata bakrangon a·kolrara dake nosto ong·engahani a·sel, re·ruraenggipa manderang neng·nikanirangko man·tokna nangengahani gimin ia ramako ta·raken taripile on·china dabiangtokaha.
Ia ramara Garo Hills-ona dakbagipa ramarangoni mongsongbatgipa rama ong·e bang·bata manderangan ia rama gitasa Garo Hills-ona re·barongbattokachim aro ian skangode Garo Hills-o nambatsranggipa ramarangoni dilsaba ong·achim.
Indake ong·genchimoba da·o ia NH-51 ramani badiaba badiaba bakrango, aro mongsongbate Goeragre aro Jengjal-ni gisepo ong·gipa kilometre 25-mangni gita ramarang obosta namsrangjaengahani a·sel ia rama gita songre songgabatenggipa manderang neng·nikanirangko chagrongna nangtokengaha ine u·iataha.
Ia ramani mitam bakrangko black topping on·e taridapani pal, cement-ni itarangchisa taridape donako nikna man·enga aro ian ramani obostako namjabatatenga ine kobor on·timgiparang u·iataha.
Ia ramani namjabatgipa bakrangara, Rongram aro Asanang-ni gisepo aro Waribok-Jengjal-ni gisepgriko ong·enga ine janapatengon, ia ramako apalbatatna gita kamrangko a·bachengahachim indiba mikkarang wachakatahani a·sel kamrang matchotkujae da·o bang·bata bakrangon a·kolrara dakakosa manderang re·na nangtokengaha ine kobor on·timgiparang parakataha.
“Asanang samba jolrango rama gonggegipa bang·e aro ramarang namsrangjae bang·bata somoirangon bostu salgipa truck garirangni a·sel ong·aniko nikna man·enga. Ia bakrango rama namjabatsrangengahani a·sel songre songgabatenggipa manderang neng·nikanirangko chagrongna nangtokenga, uni gimin ia ramako PWD ta·raken tarie on·na nanga,” ine Asananng jolo donggipa manderang parakataha.