SHILLONG: Bilsi bongana kamko ka·anio MLA-rangni kamni gimin constituency-tangtangni manderangsa rai on·gen aro bilsi bongani gisepo scheme-rangko jakkalanikoba bil donggipa official-rang nipiltaigen ine East Shillong-ni MLA Ampareen Lyngdoh parakataha.
“MLA-rangde an·tangtangni kamni gimin begulrangko sikna nangjawa aro bilsibongana kamko ka·anio an·tangtangni manderangsa raiko on·china on·na nanga. Bilsi bongani gisepo uamangni MLA maikai kamko ka·aha, uko constituency-ni manderang, pu·onanichi mesokchina,” ine Lyngdoh aganaha.
Kamrangko name ka·gipa MLA-rangnade gong kror 11-ni MLA scheme-ara mamingan ong·ja ineba Lyngdoh parakataha.
Lyngdoh-ni parakatani gitade, COVID-19 sajinmani somoirango manderangni nanganirangara bon·changjahachim aro sajinmani ja·manoba songko nokko skango gita ong·atpiltaianiara altua kam ong·jahachim.
East Shillong gita dakgipa constituency-rango report card-rangko nipilaniara maming gital katta ong·ja ine janapatengon, 2023 bilsioba uni constituency-ni manderangko uko seoktaigenchim ong·ode ua Malki-o manderangni bazar anti cha·gipa biapko taridapna nangnikenga aro cholgri ong·gipa chatro chatrirangna dakchake on·na miksongenga ine East Shillong-ni MLA parakataha.
“An·chingni cholgri ong·gipa chatro chatrirangna janggi tangani cholrangko, vocational training-rangko aro gipin cholrangkoba on·e dakchakna nangenga. An·chingo bang·bata rehabilitation centre-rangan dam rakdugaani a·sel manderang tangka paisani gita chol ong·jaengani gimin sam jakkalanio ranta ong·gimin manderangko dakchakna gita an·ching rehabilitation centre-rangkoba nangenga,” ine Lyngdoh aganaha.
An·tangni constituency-o ua pilak nalarangkon pingripatna aro rama jal·langrangko apalbatatna miksongenga ineba ua parakataha.
Da·o dipet uni constituency-ode china indita neng·nikanirangko man·kujaenga ine janapatengon, 2020 bilsionin ku·rachakanirangko on·ahaoba da·onan Umkhen water project-ko taridape on·anirang dongkujaenga ine Lyngdoh, suk ong·gijaniko parakataha.
