SHILLONG: Re·baenggipa 2023 bilsini Assembly election-na People’s Democratic Front (PDF)-ni general secretary Auspicious Lyngdoh Mawphlang-ko Mawphlang constituency-ni candidate dake seokaha ine PDF parakataha.
Sonibar salo, PDF Zonal Committee Mawphlang Constituency-ni membor-rangko rimnapna gita Mawphlang-o tom·aniko ong·atanio iako PDF-ni president Gavin Miguel Mylliem parakataha.
Mawphlang constituency-oni susana gita seokako man·gipa Auspicious Lyngdoh Mawphlang, 2019 bilsini KHADC election-oba Mawphlang-Diengiei constituency-oni susaahachim indiba ua chu·sokgipa ong·na man·jahachim ine nikna man·a.
Ia tom·anio PDF-ni president Gavin Miguel Mylliem, tom·anio bak ra·giparangna aganprakengon, Mawphlang constituency-o PDF-ni candidate chegipa ong·na man·na gita rakbee kamrangko ka·china PDF dolna kam ka·giparangko didiangaha.
Re·baenggipa 2023 bilsini Assembly election-na an·tangko Mawphlang constituency-ni candidate-na seokahani gimin PDF-ni general secretary-ba an·tangni kusi ong·aniko parakataha.
A·doko dingtanganiko ra·bana gita chadambe dilgiparangko nangenga ineba ua aganaha.
