TURA: Tura-o skanggipa changna lekka do·reng watsusaaniko mijal Robibar salni bako, Chasingre-o donggipa Inter State Bus Terminus (ISBT)-o ong·atangaha aro ia lekka do·reng watsusaanio, dingtang dingtang biaprangoni sak 100-na baten manderang re·bae bakko ra·angtokaha.
Ia lekka do·reng watsusaaniko Wild Tour Garo Hills aro Tura Adventure Club nangrime ong·atangaha aro lekka do·reng watsusaaniko bakgittam dake, chong·motan Solo Dogfight, Squad Dogfight (dolprako sakbonga memborrang ka·e) aro Most Creative Kites gadangrango ong·atangaha.
Robibar pringo mikkarang waanganichi adita jajrengna nanganirang ong·ahaoba ia lekka do·reng watsusaaniko ong·atgipa dolrang, registration ba biming segataniko pring 8:00 bajionin a·bachengataha aro uandaken biming segataniko pring 10:30 bajimango chipahaon sak 100-na baten manderang, bimingrangko segate bakko ra·angtokaha.
Ia lekka do·reng watsusaanio chegiparangara, Solo Dogfight-o Mesrang Sangma, Squad Dogfight-o Do·reng Squad aro Most Creative Kite-o Bandasal Sangma ong·a.
Ia lekka do·reng watsusaanio West Garo Hills a·jani Deputy Commissioner Swapnil Tembe, mongsonggipa sokgipa ong·e bakko ra·angaha aro lekka do·reng watsusaanio chegiparangna boksisrangko suale on·angaha.
Ia lekka do·reng watsusaanio bakko ra·angani ja·man West Garo Hills a·jani Deputy Commissioner, kobor ra·timgipa manderang baksa agangrikengon, Tura-o iandakgipa lekka do·reng watsusaaniko ong·atahani gimin an·tangni kusi ong·aniko parakatenba, mikkangchiba lekka do·reng watsusaaniko bilsiantian ong·atjringchina didiangaha.
