SHILLONG: PM Poshan ba Mid Day Meal (MDM)-ni cook aro helper-rangni dingtang dingtang dabianirangko knachakjaengani gimin Sombar sal dipet All Jaintia Mid Day Meal Workers Union (AJMDMWU)-o bak ong·enggipa MDM-ni cook aro helper-rang, sorkarini kosako jingjengatanirangko dakna a·bachengataha.
Koborko on·ani gitade, da·o dipet MDM-ni cook aro helper-rang, ma·mong sorkarioniko gong 900 aro a·dok sorkarioniko gong 100-kosan man·e japrako gong 1000 honorarium-kosan man·engani gimin uamangni honorarium ba man·gniko japrako gong 5000-ona bariatchina dabitokengachim.
MDM-ni cook aro helper-rang, Sombar pringo Shillong songjinmani additional secretariat-o donggipa parking lot-o jingjengatna gita tom·chimongtokahachim indiba ja·mano uamangko district administration, Shillong songjinmani MBOSE office sambaona jitatskaaha.
MDM worker-rangni adviser KL Pariat-ni kobor ra·timgiparangna parakatani gitade, MDM worker-rangni dormahako bariatchina dabian baksana 2019 bilsionin December aro January jagnini man·gnirangkoba on·china dabitokengachim indiba da·onan a·dokni chief minister, uamangni dabienggipani bidingo changsa agangrikna okama dongkujaengachim.
“MDM cook aro helper-rangna a·dok sorkarini japrako on·enggipa gong 100 honorarium-ko gong 900-ona bariatchina aro December aro January jagnini dormahakoba on·china dabie chinga 2022 bilsini August 11 tarikona kingking chitti kingchetko chief minister-na seatahachim indiba da·alonan chinga chief minister-ni maming aganchakanirangko man·kujaenga,” ine Pariat aganaha.
Skulrango poraienggipa bi·sarangna cha·anirangko song·e on·na gita da·onan Meghalaya a·doko skul damsaba LPG-rangko man·kujaengani gimin LPG-rangko bree jakkalna gita tangka paisarangko on·chinaba MDM worker-rang sorkario dabiengachim ineba Pariat parakataha.
Skulrango bi·sarangkode bolrangko ge·dape ripingchina skie on·enga indiba ia apsan skulrangon cha·anirangkode am·bol aro koelarangchisa song·skaenganiara namen kratcha·na nangani katta ong·enga ineba Pariat aganaha.
