SHILLONG: Mongolbar salo Meghalaya Cabinet tom·e chanchirimangenba, West Garo Hills a·jani Babadam songo Medical Skill Hunar Hub-ko rikna gita ra·chakangaha.
Iani bidingo a·dokni Chief Minister Conrad K Sangma, kobor ra·timgiparangna parakatengon, ia Hunar Hub-ko rikna gita India sorkarini Minority Affairs Ministry, gong kror 151.95 tangkarangko chamataha aro iano sak 2500 chatro chatrirangna biap dongan baksana iano hostel-rang, pharmaceutical college, nursing college, paramedical college aro skill development centre-rangba donggen ine parakataha.
“Salgro salaram jolrango an·seng baljokani kamrangko ka·enggiparangna sanna banani kamrangko nambate skie on·na man·na gita ia project-ko 2020 bilsio a·bachengataha aro ia Hunar Hub-ko West Garo Hills a·jao kulina sorkari seokaha,” ine Chief Minister aganaha.
Chief Minister-ni parakatani gitade, ia project-ko a·bachengatna tik ka·miting somoio West Garo Hills a·jamangmangsan Meghalaya a·dok gimiko Minority Affairs Ministry-ni dakchakanirangko man·enggipa a·ja ong·ani gimin ma·mong sorkari ia project-ko West Garo Hills a·jaon kulina seokahachim.
“Ia project-na a·bachengode ma·mong sorkari, gong kror 282-mangko chamahachim indiba proposal-ko nipiltaiangani ja·man Minority Affairs Ministry, gong kror 151.95-ko chamskana tik ka·aha aro ianoni 10 percent-kode Meghalaya sorkari on·gen indiba bangki korosrangkode ma·mong sorkarian on·gen,” ine Sangma aganaha.
Ia project-na chamgipa tangka paisarangoni skanggipa bakkode watatmanaha ine talatangengon, ia kamko jako ra·e ka·na gita KPI Engineering Pvt Limited-ko seokmanaha ine Chief Minister parakataha.
“Ia Hunar Hub-ko West Garo Hills a·jao North Tura constituency-ni ning·o donggipa Babadam jolo rikgen aro iano Garo Hills-onisan ong·aigija salgro salaramni dingtang dingtang biaprangoni re·bae poraienggipa gimik sak 2500-na baten chatro chatrirang poraina cholko man·gen. Ia Hunar Hub-o hostel-rangna agreba, pharmaceutical college, nursing college, paramedical college aro skill development centre-rangba donggen,” ine Chief Minister parakataha.
