TURA: ‘Rimpu Bagan’ mamlani bidingo mokordoma ka·a man·gipa sak 15 manderang, an·tangtangko West Garo Hills a·jani police-rang maming a·sel gri rim·e kal·ake roaha ine matnangenba, National Human Rights Commission (NHRC)-na badi ka·doangaha.
Ia sak 15 manderang, investigating officer (IO) Mamata Hajong aro West Garo Hills a·jani Superintendent of Police (SP) Vivekanand Singh-ni kosako ja·kurangko de·china gitaba NHRC-ko mol·molataha.
Re·anggipa July jani 22 tariko, West Garo Hills SP-ni dilanichi police-rang, Tura Edenbari jolo donggipa Tura-ni MDC Bernard Marak-ni ‘Rimpu Bagan’-ko chadrapenba, sak 73 manderangko rim·ahachim aro ia sak 73 manderangoni sakbongade da·oba judicial custody ning·o donako man·kuengachim.
Ia sak 15 manderangni, NHRC-na badi ka·anio parakani gitade, police-rangni ia biapko chadrapeani somoio ua biapo rosoenggipa manderangko, an·tangtangni rochakenggipa biapon dongchina ge·etahachim aro uandaken mitamrang bagano re·roroe rotokengachim aro mitamrangde ripengskarang baksa asonge rotokengachim. Mitam manderang ua somoio, Rimpu Bagan-o man·gipa ‘Momo’-koba cha·na gita ua biapona re·angahachim.
Indake ong·engon, ua biapo rim·ako man·gipa me·chik saksa, jean ku·agananio neng·nikaniko man·gipa ong·achim, uni segipani parakatani gitade, Rimpu Bagan-o ‘homestay’-ba dongjolani giminsa ua somoio uamangni nokona mande sokani gimin uamang ua biapo kuturiko ra·ahachim.
“Chingni nokona mande sokani giminsa aro chingni noko chu·onga gita kuturirang dongjani giminsa chinga ua biapo waltuna re·angahachim. Anga bilsi chikkingna baten ia me·chik baksa mikchagrikengachim aro chingni nokdangni manderangba chingni gimin ma·sitokachim. Iako anga police-rangna talate on·na jotton ka·on, uamang chingni aganako knachakgija chingko rim·aha,” ine ia mande parakataha.
Ia mandede jamin man·e pattokoni jokpilaha indiba uni mikchagipakode da·oba pattokoniko watpilkujaenga ineba ua parakataha.