SHILLONG: New Shillong Township-o gital rikenggipa Assembly building-ni protchong be·gruaniko am·sandigipa Indian Institute of Technology-Guwahati (IIT-Guwahati)-ni report-ko Public Works Department (PWD)-na pakwate on·ataha.
Sorkari official saksani kobor ra·timgipa manderangna parakatani gitade, IIT-Guwahati-ni pakwate on·atani ja·man da·o ia report-ko PWD (Buildings)-ni official-rang niengaha.
“Ia report-ko PWD-ni official-rang nia matchotahaon, a·dok sorkarina aro high powered committee-na pakwate on·atgnok,” ine sorkari official parakataha.
Da·o dipet ia report-o janapaniko chu·gimik tale ma·sikujaengoba, re·anggipa May jani 22 tariko ia gital Assembly building-ni protchong be·gruani bidingo am·sandigipa IIT-G dolni manderang, dingtang dingtang a·selrangko mesoke on·aha ine sorkari official-rang parakataha.
Ia Assembly building-ni be·gruanina korosrangko Uttar Pradesh a·dokni Rajkiya Nirman Nigam Limited gamgen ineba sorkari official parakataha.
Protchong be·gruanio ia Assembly building-ni jakra aro jakasi grangrango adita be·sriana agrede maming nosto ong·dapa dongjani gimin ia building da·o dipet naljoken dongenga ineba official parakataha.
New Shillong Township-o gital rikenggipa Meghalaya Assembly building-ni protchong be·gruani a·selko re·anggipa June jaonin, Guwahati Indian Institute of Technology (IIT)-ni sakbonga membor-rang sandirokna a·bachengatahachim.
Ia gital Assembly building-ni metric ton 4000-na batgipa protchong, May 22 tarik pringwalo be·gruahachim aro ia protchong be·gruani ja·man, dingtang dingtang political dolrang, NGO-rang aro a·doko songdongenggipa manderangba, ia nokko rikani bidingo sorkariko sing·doenba, CBI-chi inquiry-ko dakchina dabitokahachim.
