BAGHMARA: South Garo Hills a·jani Para Legal Volunteer-rangna re·anggipa August 30 aro 31 tarikrango salgnina Training program-ko Baghmara-o donggipa DRDA Training Hall-o ong·atangaha aro ia training program-ko South Garo Hills a·jani gital Para Legal Volunteer-rangna agan-ku·pattianirangko on·na gita NALSA-ni ning·o South Garo Hills a·jani District Legal Services Authority (DLSA)-ni gita ong·atangaha.
Ia training program-ko a·bachengatani salo, South Garo Hills a·jani Chief Judicial Magistrate Daniel S Marbaniang, jinmana aganprakengon, Para Legal Volunteer-rangni namgnirangko agan-talate on·angenba, manderangna dangdike on·anio police-rangna aro sorkari official-rangna dakchakanirangko on·china, gital Para Legal Volunteer-rangko didiangaha.
Jolni manderang ka·dongchakna man·na gita Para Legal Volunteer sakantian ka·donggipa aro kakketgiparang ong·na nanga ineba ua aganaha.
Ia program-ko ong·atanio Para Legal Volunteer-rangna agan-skie on·anggipa gipin manderangara, 1st Class Judicial Magistrate R Dachi K Sangma, Assistant Public Prosecutor Alme Sanches D Shira, Legal Aid Counsel Nickanur M Sangma aro gipinrang ong·a.
Ia training program-ni skanggipa salo sak 20 chadamberang re·baenba, an·tangtangko Para Legal Volunteer dake biming segatangaha.
