SHILLONG: Meghalaya a·doko Mid Day Meal (MDM)-ni cook aro helper-rangni dormahako bariatna gita a·dok sorkari ku·rachakaniko on·ahani gimin All Meghalaya Mid-Day Meal Workers Union (AMMDMWU)-ni jingjengataniko dontongatpilna tik ka·angaha.
Iani bidingo kobor ra·timgipa manderang baksa agangrikengon, Education department-ni Commissioner & Secretary BDR Tiwari aro Education department-ni Director A Ch Marak, uamangko agangrikna okamatenba, MDM worker-rangni man·gniko bariatna gita ia 2022 bilsini August 11 tariko Finance aro Planning department-na watatgipa proposal-ko mesokaha ine MDM worker-rangni adviser KL Pariat parakataha.
“Ia proposal-o Education department, a·dok gimikni sak 18,776 cook aro helper-rangna 2022 bilsini April jaoni Novembet jaona aro 2023 bilsini February jaoni March jaona, japrako on·enggipa gong 1000-ni honorarium-ko gong 2000-ona bariatchina, Finance aro Planning department-ko didiataha,” ine Pariat parakataha.
Pariat-ni aganani gitade, MDM worker-rangna dormahako gong 2000-ona bariatna sorkarini miksongenggipara a·dokni bakonikosa ong·engani gimin aro ian PM Poshan Scheme-ni dongimin niam gita ong·jaengani gimin December aro January jani dormaharangkode on·na man·jawa ine Education official-rang talate on·aha.
Ia proposal-ko Cabinet ra·chakahaon, Meghalaya a·dokni MDM worker-rang a·dok sorkarini bakoniko gong 2000 ka·e aro ma·mong sorkarini bakoniko gong 1000 ka·e man·gnok ine MDM worker-rangni adviser parakataha.
MDM worker-rangna chu·gimik ja 12-ni dormahako on·china dabianikoba a·dok sorkari ta·raken niatna ku·rachakaniko on·ataha ineba Pariat parakataha.
Indake ong·genchimoba Pariat-ni aganani gitade, MDM-ni kamrangna LPG-ko on·aniara PM Poshan Scheme-ni ning·o ong·jani gimin da·o dipet LPG-ko jakkalna dabianikode sorkari chu·sokatna man·jawa ine Education official-rang parakataha.
“Uni gimin da·o chinga chingni jingjengataniko dontongatchengenba skultangtangona re·ange kamrangko ka·piltaina tik ka·aha indiba dormaharangko bariatna kam ka·aniko ia 2022 bilsini November jaona kingking chinga somoiko on·angaha. Chingni on·gimin somoi gita chingna dormahako bariatna man·jagenchimode December jaoni bilakbate jingjengatna a·bachengatgen,” ine MDM worker-rangni adviser parakataha.
