SHILLONG: Shillong songjinmani Them Iew Mawlong-o donggipa Sweepers Colony (Harijan Colony)-ni dol 342 nokdangrangko, Meghalaya a·dokni Urban Affairs department, Shillong Municipal Board (SMB)-ni quarter-rangona apjitatna tik ka·angaha.
SMB-ni resident quarter-rangara, Bishop Cotton Road-o donggipa SMB-ni office sambaon ong·achim ine nikna man·a.
Sweepers Colony-o songdongenggipa nokdangrango SMB-ni quarter-rangona apjitna gita tarigimin blueprint-ko Budbar salo, Urban Affairs Minister Sniawbhalang Dhar, a·dokni Deputy Chief Minister Prestone Tynsong-na pakwate on·angaha.
A·dokni Deputy Chief Minister Prestone Tynsong-ara, ia nokdangrangko gipin biapona apjitna gita songe dongimin High Level Committee (HLC)-ni chairperson-ba ong·engachim ine nikna man·a.
Tynsong-ni parakatani gitade, ia SMB-ni quarter-rangko gital dake taridapnaba nangengachim aro iani bidingo Urban Affairs department, una aditako talateba on·angjolaha.
“Urban Affairs department-ni on·gipa technical report-o parakani gitade, Sweepers Colony-ni ge 342 nokdangrangko ia apsan biapon ma·chakna man·aigen,” ine Tynsong aganaha.
Iani bidingo a·dokni Deputy Chief Minister, Detailed Project Report (DPR)-ko tarie ra·bachina gitaba Urban Affairs department-na ge·etaniko on·atskaaha.
Urban Affairs department-oni DPR-ko on·ahaona Harijan Panchayat Committee (HPC) baksa sorkari tom·aniko ong·atenba, uamangna proposal-ko mesoke on·anggen ine Tynsong parakataha.
