WILLIAMNAGAR: East Garo Hills a·jani Jalwagre Songgital skulo bilsi gittam ong·nasipile skigipa dongjaengani a·sel skulo poraienggipa bi·sarang neng·nikanirangko chagrongna nangtokenga ine kobor on·aha.
Ia Jalwagre Songgital songara, Rongjeng C&RD Block-ni ning·o donggipa song ong·a indiba ian Songsak constituency-ni ning·o ga·akgipa songsa ong·skaachim ine kobor on·timgiparang u·iataha.
Jalwagre Government LP School-ni president Salseng M Sangma-ni kobor ra·timgipa manderangna parakatani gitade, ia skul da·o bilsi 60 batpilengahachim aro batanggimin bilsignini gisepo skulo poraigipa bi·sarangba bang·batahachim. Indake ong·genchimoba ia skulo skigipa dongjae, skulo poraienggipa bi·sarang neng·nikanirangko chagrongna nangtokenga ine skulni president parakataha.
“Ia skulo skigipa a·bachengonin kamchi re·a tik ong·jachim indiba batanggimin bilsignimangonin ua skulona re·basrangjaengaha. COVID sajinmani somoiko hisapede ia skulo poraienggipa bi·sarang class-ko man·gija da·o bilsi gittam ong·pilengaha,” ine skulni president parakataha.
Koborko on·timgiparangni parakatani gitade, ia skulni skigipa Sengwan Marak-ko adita bilsirangna skangan permanent basis-o kamo rakkiahachim indiba ua kam ka·chengaonin kamtangko name ka·jahachim.
Ia skigipani skulona re·bagijani da·o bilsi gittam gapengahani gimin songni manderang aro skulni dilgiparang, DMO-na badi ka·doangahachim indiba da·onan ia skigipani kosako maming ja·kurangko de·kujaenga ineba kobor on·timgiparang parakataha.
Iani bidingo East Garo Hills a·jani DMO-o sing·sandiaton, uamang skulni badi ka·aniko man·soaha aro ia skigipani kosako ja·kuko de·china SDSEO-ko aganataha ine parakatskaaha.