SHILLONG: Meghalaya a·doko Bharatiya Janata Party (BJP), NPP-chi dilenggipa Meghalaya Democratic Alliance (MDA)-o bakrimaniko watna miksonganirang dongengani gimin re·baenggipa 2023 bilsini Assembly election-na skang a·doko politics-ni gita adita dingtanganirangko niknaba gnang.
Koborko on·ani gitade, MDA-o tangka jakkalsretanirangko aro pilak ong·gija dakanirangko Enforcement Directorate (ED) aro Central Bureau of Investigation (CBI)-ni sandirokataniko dakna sakkirangko chimongengaha.
“Chinga jasani gisepon MDA-o bakrimaniko watnaba gnang. Da·o dipet chinga chanchirimanirangko dakenga aro iani bidingo chinga chingni national president JP Nadda baksaba agangrikmanaha,” ine Sonibar salo, BJP-ni national vice president aro Meghalaya a·dokni in-charge Chuba Ao parakataha.
MDA sorkarini kosako tangka paisarangko jakkalsretani aro ong·gija dake kamrangko ka·ani bidingo matnanganirangko man·engani gimin ua ia kattarangko aganaha.
“Chinga badi ka·anirangko bang·en man·soaha indiba chingna sakkirangko nangenga. Chinga lekkarangko man·ahaon ED aro CBI-chi sandirokarangko dakanggnok,” ine Ao aganaha.
Ao-ni parakatani gitade, BJP dol tangka jakkalsretanirangko bon·atna kam ka·engani gimin MDA sorkarini kosako matnangenggipa kamrangni bidingo sakkirangko sandichina BJP-ni membor-rangko ge·etmanaha.
Re·baenggipa bilsini Assembly election-o NPP dol, an·tangari susagen ine parakatgipani gimin sing·on, ian uamangni skanisa ong·aia aro iano BJP maming bak dongja ine Ao parakataha.
“Chinga uamangko mol·molna ba ge·etna gita man·jawa indiba da·o gital sorkariko BJP gride songjawa,” ine ua aganaha.
