SHILLONG: Gitcham police officer M Kharkrang, Sonibar salo Bharatiya Janata Party-o napaha. Party-o napani ja·man The Shillong Times-ni kobor ra·timgiparang baksa agangrikengaon, M Kharkhrang indine aganaha, “angni service-o ong·mitingo a·dokni dingtang dingtang jolrangona songree niaha, unon anga manderangni chagronggipa neng·nikarangko u·iaha. Songo-noko donggiparang baditan mipalsan jajrenge songko nokko wate songjinmaona kattoka. Police ong·e dangdike on·mitingo anga police ong·ani gimin kam ka·anirango champengani dongachim, indiba anga manderangni namgnina kam ka·na chanchironga, indiba namgipa aro kragipa platform ba cholko man·jani gimin jakko tom·e dongna gita nangao ga·akaha. Iarangni gimin chanchie nion anga a·jolni manderangna dangdike on·na miksonganio political party-o napna chanchiaha.”
Uandake BJP-ko communal party ba jat basee kam ka·gipa dol ine agantokani gimin sing·on, “ian tol·e jangbingbanggipa kattasan ong·aia, BJP-ni mongsonggipa agenda-an development ong·a, gipin a·dokrango BJP-ni kam ka·aniko baditan nikna man·enga,’ ine aganchakaha.
Iarangni gisepo Kharkhrang, uni kam ka·na miksonganiko janapatengon, “constituency-na health, education, unemployment aro security-o kam ka·na aganaha.
Uandake constituency-o bang·a candidate-rang dongpaani gimin kobor ra·timgiparangni sing·on, “constituency-ni voter-rang seng·giparang ong·a, uamang tol·e ku·rachakaniko basena u·igiparang ong·a’ ine aganaha.
“ Voter-rang candidate sakantini kam ka·aniko nitoka, sorkari official ong·e dangdike on·mitingo anga maidake kamrangko ka·aha iako manderang u·itoka.” Indake ong·engon BJP, una ticket-o on·genma on·jawa, iani gimin parakata dongkuja.
