SHILLONG: NPP-chi dilenggipa Meghalaya Democratic Alliance (MDA)-o bakrimaniko ra·pilna gita Bharatiya Janata Party (BJP)-ni ka·mikkenataniara ‘dakmikanisan’ ong·aia ine Robibar salo, Rajya Sabha-ni MP aro NPP-ni state president WR Kharlukhi parakatenba, Enforcement Directorate (ED) aro Central Bureau of Investigation (CBI)-ko BJP dol, politics-ni kamrangna jakkalsretenga ine opposition dolni matnanganiko BJP-ni national vice president aro Meghalaya a·dokni in-charge M Chuba Ao ku·rachakskagenma ine sing·doangaha.
“BJP-ni ka·mikkenataniara ‘se·el dongjamitingo, se·el! se·el!’ ine chrikwatamingsa apsanaienga. Jadokna skangba uamang ia apsan kattakon aganaha aro da·oba apsankon aganenga. Uni gimin chinga uamangni kamko senge nigen,” ine Kharlukhi aganaha.
Jasani gisepon NPP-chi dilenggipa MDA-o bakrimaniko ra·pilnaba gnang aro MDA sorkarini ong·gija dakgipa kamrangko ED aro CBI-chi sandirokatna gita uamang sakkirangko chimongengaha ine Sonibar salosan BJP-ni national vice president aro Meghalaya-ni in-charge Ao parakatahachim.
Ao-ni iandake agangipa kattarangko jegalatskaengon, “ED aro CBI-ko ra·bana Ao-ni agangipa kattarangara namama namja anga ma·sija maina ia ED aro CBI-ara BJP-na kam ka·enggipa agency-rang ong·ama ong·ja anga name ma·sija,” ine NPP-ni state president parakataha.
“Home Minister ia kattarangko agangenchimode anga ra·chakna man·aigenchim indiba BJP-ni in-charge ong·e iandakgipa kattarangko agananiara namen kragijani ong·enga. Uni iandakgipa kattarangko agananiara uamangni gisepo jajaani ong·enga gita nikna man·enga,” ine Kharlukhi aganaha.
NPP-ko nisan ka·e matnangenganina BJP-ko sing·doatengon, “Uamang NPP gride bilo ong·na man·chongmotjawa maina NPP-sa uamangko dakchakenggipa gita ong·enga. NPP dongjaode uamang sorkario ong·na man·jawa,” ine NPP-ni state president parakataha.
Batanggimin chang election-o BJP dol, seat ge·gnikosan man·rikaiaha aro ia changoba uamang badita seat-rangko man·na ka·dongenga ineba Kharlukhi sing·doataha.
Tangka paisa jakkalsretani giminsa aro ong·gija kamrangko ka·engani giminsa NPP-chi dilenggipa MDA-ni kosako BJP dol, ED aro CBI-chi sandirokatna gita sakkirangko chimongenga ine Ao-ni agangipa kattarangna aganchakaniko on·angengon, “BJP-san ong·aigija TMC-ba nanga gita sakkirang donggenchimode maini gimin FIR-ko ka·jaenga ba kachariona ra·angjaenga?” ine Kharlukhi sing·doataha.