Chang 61-gipa Skigiparangni Salko a·dokni dingtang dingtang biaprango manianga

SHILLONG/TURA: Mijal September-ni 5 tariko chang 61-gipa Teachers’ Day ba Skigiparangni salko India a·song gimikon maniangtokengon, Meghalaya a·dokni dingtang dingtang biaprangoba ia salko dingtangmancha skigiparangko mande ra·pilskana aro mittelpilskana gita maniangaha.
Bilsiantian September-ni 5 tariko, India a·songni gnigipa President Dr Sarvepalli Radhakrishnan-ni atchiani salko gisik ra·na gita Skigiparangni salko India a·song gimikon manirongenga aro uandaken Meghalaya a·dokoba ia salko dingtang dingtang skul aro college-rango dingtang dingtang program-rangko ong·ate maniangtokaha.
Shillong songjinmao ia Skigiparangni Salko sorkarini gita, U Soso Tham Auditorium-o manidilangaha aro ia manianio a·dokni Education Minister Lahkmen Rymbui mongsonggipa sokgipa ong·e jinmana aganprakangengon, chatro chatrirangna a·gilsakni seng·aniko on·na gita an·tangtangko on·kange kamrangko ka·engani gimin skigiparangko mittelpilangaha.
COVID-19 batrikrikani somoirango chatro chatrirangna lekka porako on·anio neng·nikanirangko chagrongna nangahani gimin janapatengon, ua somoio internet gita chatro chatrirangna lekka porako on·aniara altua kam ong·jagenchimoba skigiparang, rakbee kamrangko ka·ahani a·sel chatro chatrirangna dontonggija lekka porako on·na man·aha ine Education Minister parakataha.
Skigiparangni dingtang dingtang neng·nikani aro ra·bianirangko sorkari namatna jotton ka·enga ineba Rymbui aganaha.
Shillong songjinmao Skigiparangni Salko manianio a·dok gimikni sak 13 skigiparangna State Award-rangkoba Education Minister-ni jakchi on·angjolaha.
Indake ong·engon, ia chang 61-gipa Skigiparangni Salko Tura-ni District Auditorium-oba maniangaha aro ia manianio Chief Minister-ni Advisor aro North Tura-ni MLA Thomas A Sangma, mongsonggipa sokgipa ong·e bakko ra·angaha.
Ia tom·anio West Garo Hills a·jani Deputy Commissioner Swapnil Tembe, Tura Municipal Board-ni Chairman JD Sangma, District School Education Officer RTK Sangma, Sub-Divisional School Education Officer Samuel Ch Marak, dingtang dingtang department-ni officer-rang, principal-rang, skigiparang aro chatro chatrirangba dongpae bakko ra·angtokaha.
Ia manianio North Tura-ni MLA, award man·gipa skigiparangna aro pilak skigiparangnan an·tangni namgipa skaniko parakatengon, skigipani kamara chatro chatri sakantini janggi tanganiko dingtangatgipa ong·e, chatro chatrirangko mikkangchi a·songko aro jatko dilna tarigiparangan ong·a ine parakataha.
An·tangtangko on·kange kam ka·engani gimin skigiparangko mittelpilangengon, skigiparangni a·selsa da·alo ua ia biapo chadengna aro jolni manderangna dangdike on·na man·enga ine Sangma parakataha.
A·gilsakni seng·aniko on·na kamko ka·engon, skigiparang dingtang dingtang neng·nikanirangko chagrongna nangronga ine janapatengon, neng·nikanirangko chagrongna nanggenchimoba chatro chatrirangni gimin chanchie kamtangtangko name ka·angkuna nanga ine Sangma didianiko on·angaha.
Apsan daken, North Garo Hills a·jaoba ia chang 61-gipa Skigiparangni Salko Resubelpara Girls Higher Secondary School-o maniangaha aro ia salko manianio Meghalaya Assembly-ni Deputy Speaker aro Resubelpara-ni MLA TD Shira, mongsonggipa sokgipa ong·e jinmana aganprakangengon, skigiparangan mandeni janggi tangani gadangko dingtangatgiparang ong·a ine mittelpilaniko parakangaha.
A·gilsakni seng·aniko gipatanio rake kamko ka·angkuchina gita skigiparangko didiangengon, “Skigiparangan inda gita ong·a aro chatro chatrirangara a·site gita ong·a. Skigiparang da·alo maidake chatro chatrirangko taria, ugitan chatro chatrirang mikkangchi ong·gen,” ine Shira parakataha.
Ia manianio dingtangmancha North Garo Hills a·jani seokako man·gimin skigiparangnaba district award-rangko on·angjolaha.
Meghalaya a·dokni gipin biaprango gitan South West Garo Hills a·jaoba chang 61-gipa Skigiparangni Salko Ampati-ni St Claret Secondary School-o maniangaha aro ia salko manianio SWGH a·jani skigipa sakgittamna district award-rangko on·angaha.
Ia manianio South West Garo Hills a·jani Deputy Commissioner Gideon Kharmawphlang, mongsonggipa sokgipa ong·e, jinmana aganprakangengon, chatro chatrirangna a·gilsakni seng·aniko on·na kamrangko ka·engani gimin skigiparangko mittelpilangenba, bi·sarangko namgipa manderang ong·atna gita pangnan an·tangtangko on·kange kamko ka·china skigiparangko didiangaha.
Chatro chatrirangna a·gilsakni seng·aniko skie on·e mande ong·atna skang, an·tangtangba skie ra·chengchina gita ua skigiparangko didiangaha.
Ampati-o ia skigiparangni salko manianio dongpae bakko ra·anggipa gipin manderangara, SWGH a·jani Additional DC AVD Shira, Resubelpara DIET-ni gitcham Principal Theresa G Momin aro gipinrang ong·a.