TURA: Ia bilsini Teachers Day ba Skigiparangni Salko manianio East Garo Hills a·jani Williamnagar-o donggipa Educere Higher Secondary School-ni headmistress Gamchi Timre R Marak-ba National Award-ko man·aha.
Ia bilsini Skigiparangni Salko manianio ia National Award-na salgro salaram a·dokrangoni saksni skigiparangko seokahachim aro ia saksni skigiparangoni Educere Higher Secondary School-ni headmistress Gamchi Timre R Marak-ba saksa ong·paaha.
Iana skangba ua 2013 bilsio District Teacher Award-ko aro 2015 bilsio State Award-ko man·an baksana 2016 bilsio New Delhi-ni Rashtrapati Bhavan-o award man·gipa skigiparangna in-residence program-ko ong·atanioba ua seokako man·ahachim.
Sombar salo, Skigiparangni Salko New Delhi songjinmani Vigyan Bhavan-o maniani somoio Gamchi Timre R Marak aro gipin skigiparangna a·songni President Droupadi Murmu-ni jakchi National Award-ko on·angaha.
