TURA: North Garo Hills a·jao donggipa Mendipathar Secondary School-ni gital nokko rikgija galchipenga ine Mendipathar-ni A·chik Youth Welfare Organisation (AYWO) matnangataha.
AYWO Mendipathar regional branch-ni president LG Momin-ni parakatani gitade, ia skulara Mendipathar bazar-oni km 1-mang chel·ao donggipa Babupara songo ong·achim aro ia skulo gital noko rikna gita 2009 bilsion, DoNER Ministry-ni Non-Lapsable Central Pool of Resources (NLCPR) scheme-ni ning·o tangka paisarangko man·soahachim.
Ia skul nokko 2010 bilsion matchotani ong·ahachim indiba ia skulko rikna a·bachengani somoio adita krongrangko songaonin ia skul nok be·en pil·chipjaha ine AYWO Mendipathar branch-ni president parakataha.
“Ia skul nokko rikgija galchipe donahani gimin aro ia skul nokko rikna contract man·gipa manderangni kosako maming ja·kurangko de·jahani gimin skulni principal, skulni executive membor-rang aro contractor-rangni kosako raken jegalatenga. Ia skul nokko rikgija galchipahaoba da·alonan iani bidingo sandirokaniba dongja aro dos donggipa manderangni kosako maming ja·ku de·anirangba dongja,” ine Momin parakataha.
Iandake skul nok rikna on·aniko bon·chipataniara skulni managing committee-na kratcha·na nangani ong·enga ine janapatengon, ia skul nokko rikgija galchipe donengani gimin inquiry-ko dakenba dos donggipa pilak manderang aro official-rangni kosako rakgipa ja·kurangko de·na nanga ine AYWO Mendipathar branch dabiangaha.
