TURA: India a·song gimikon chang 61-gipa Teachers Day ba Skigiparangni Salko kusi ong·e manitokengon, Garo Hills-ode deficit skulrango skigiparang, uamangni dingtang dingtang dabianirangko sorkarini knachakjaengani gimin Sombar salo, an·tangtangni suk ong·gijaniko mesokna gita badge gisimko gane bak ra·angtokskaaha.
Garo Hills Deficit School Teachers & Employees Association (GHDSTEA)-ni parakatani gitade, deficit skulrango skigiparangni dormaharangko bariatchina, DCRG-ko gong lak 3-oniko gong lak 10-ona bariatchina, deficit skulrango skigiparangna taridapgimin ACPS-ko ra·gatchina, deficit skulrango skigiparangna service rule-rangko matchote tarichina aro kamoni neng·takgimin skigiparangna social security benefit-rangko on·china dabiengachim.
Indake ong·genchimoba ia dabianirangko sorkari da·alonan knachakna gisiko nangjaengani gimin deficit skulrango skigiparang, mijal Skigiparangni Salko manianio, an·tangtangni suk ong·gijaniko mesokna gita badge gisimko gane bak ra·angtokaha.
Iani bidingo GHDSTEA baksana Khasi Jaintia Deficit School Teachers Association (KJDSTA)-ba batanggimin somoirango a·dokni Chief Minister Conrad Sangma aro Education Minister Lahkmen Rymbui-na baditaba chang memorandum-rangko on·angahachim aro Education department-ni official-rang baksaba tom·e chanchirimangahachim indiba skigiparangni dabianirangko da·onan chu·sokate on·kujaenga ine skigiparang parakataha.
“Chingni dabianirangko sorkari chu·sokate on·na ku·rachakani ja·manoba da·onan maming ja·kurangko de·kujaengani gimin chinga skigiparangni salo, chingni suk ong·gijaniko mesokna gita badge gisimko gane bak ra·angtokaha,” ine GHDSTEA-ni dilgiparang parakataha.
Deficit skulrango skigiparangni dabianirangko sorkari knachakangkujagenchimode mikkangchi skigiparang badge gisimko gane mesokangkuan baksana bilakbate jingjengatanirangko dakangkugen ineba GHDSTEA-ni dilgiparang, mikrakataniko on·angaha.
Skigiparangni Salo deficit skigiparang badge gisimko gane bak ra·angtoka
Date:
Share post:
