SHILLONG: Community Health Centre (CHC)-ona ra·doatgipa Mawryngkneng primary health centre (PHC)-ko Budbar salo, a·dokni Chief Minister Conrad K Sangma kulie on·angaha aro ia apsan somoion ua an·o donggipa me·chikrangna rikgipa Transit Home-koba kulie on·angjolaha.
Mawryngkneng CHC-ko kulie on·angani somoio a·dokni Chief Minister, jinmana aganprakangengon, ia CHC-ni PHC ong·kuengmiting somoio iano ge·dok palangrangsan dongaiahachim indiba da·o ia PHC-ko CHC-ona ra·doatahani gimin ge 30 palangrang dongaha aro manderang nambata sanna bananirangko ra·na man·gnok ine parakangaha.
Ia CHC-o mikkangchi specialized service ba dingtangmanchagipa kamrangkoba ra·bana sorkari jotton ka·gen ineba ia tom·anio Chief Minister parakataha.
An·o donggipa me·chikrangna Transit Home-ko kulie on·angskaengon, ian chel·begipa biaprangoni an·o donge re·baenggipa me·chikrangna naljokaniko aro pilak nanga dakchakanirangko on·na miksonge rikgipa nok ong·a aro a·doko da·o dipet iandakgipa transit home-rang dam 180-mang dongaha ine Chief Minister parakataha.
Songadam nokadamrango me·chikrangko mangrakbatatna gita a·dok sorkari, dingtangmancha self help group (SHG)-rangna dakchakanirangko on·enga ine janapatengon, a·dokni dam 12 a·jarango donggipa dol 896 village organisation (VO)-rangna gong kror 20 tangkarangko Community Investment Fund (CIF)-ni bimingo on·ataha aro ian a·dok gimikni ge 46,700 nokdangrango nangchakegipa dol 4676 SHG-rangna namgni ong·gnok ine Chief Minister parakataha.
Mawryngkneng CHC-ko kulie on·na gita tom·aniko ong·atanio dongpae bakko ra·anggipa gipin manderangara, a·dokni Deputy Chief Minister Prestone Tynsong, Mawryngkneng-ni MLA aro MDC Pyniaid Sing Syiem baksana dingtang dingtang department-ni officer-rang ong·a.
