TURA: Rongjeng Model Degree College-ko rikanirang namjani gimin ia college-ko rikpiltaie on·na gita sorkarini ku·rachakaniko on·ani ja·manoba da·onan kamrangko a·bachengata dongkujaengani gimin Rongjeng jolni dingtang dingtang NGO-rang, jekai FKJGP Rongjeng circle, GSMC Rongjeng unit aro uandakgipa dingtang dingtang dolrang, jingjengatpiltaina ka·mikkenataniko on·angaha.
Ia Rongjeng Model College-ko RUSA-ni ning·o gong kror 12-na batgipa korosrangchi rikahachim indiba college-ko rikanio kamrang namjahani gimin jolni NGO-rang, ta·raken inquiry dake nanga gita ja·kurangko de·china dabitokahachim.
Indake ong·engon, NGO-rangni parakatani gitade, ia bilsini April 14 tariko, sorkarini watatako man·gipa dolsa engineer-rang, ia college-ko re·ange nienba, ia college-ko nambate rikna ku·rachakaniko on·ahachim. Uni ja·man April-ni 29 tarikoba Meghalaya Legislative Assembly-ni Public Accounts Committee aro sorkari officer-rang, ia college-ko nina re·angenba, August jani gisepon ia college-ko matchotate on·na ku·rachakbaahachim.
Indake ong·genchimoba, da·o September ja ong·pilahaoba ia college-o maming kamrangko a·bachengata dongkujaengani gimin NGO-rang, suk ong·gijaniko parakatenba, sorkarini kosako bilakbate jingjengatanirangko dakna ka·mikkenataha.
“Ia college-ko rikani kamrang namjani gimin sorkarini kosako jingjengatanirangko dakahaoba sorkari chingni jingjengatanirangko dal·e ra·jaenga ine chinga nikna man·enga. Ia college-ko rikpiltaienba August jani gisepon matchotate on·na ku·rachakahaoba da·alonan chinga ia biapo kam a·bachenganiko nikna man·kujaenga. Uni gimin chingni dabianina sorkari nachil songjaenga ong·ode chinga sorkarini kosako bilakbate jingjengatanirangko dakangskagnok,” ine Rongjeng-ni NGO-rang parakataha.
Ia Rongjeng Model Degree College-ko rikna gita 2019 bilsini February jaon, a·songni Prime Minister Narendra Modi, video conference gita pangchakaniko songe on·angahachim ine nikna man·a.
Ia model degree college-o chatro chatrirangna Science, Arts aro Commerce stream ge·gittamkon ra·na manchisoenga ineba nikna man·a.
Rongjeng Model College-ni bidingo NGO-rang jingjengatpiltaina ka·mikkenata
Date:
Share post:
