NEW DELHI: Re·baenggipa September 25 tariko Indian National Lok Dal (INLD), Haryana a·doko jinma tom·bimonganiko ong·atengon, ia tom·bimonganiona Meghalaya a·dokni Governor Satya Pal Malik-koba okamataha ine kobor on·aha.
Kobor on·timgiparangni u·iatani gitade, ia tom·bimonganiko ong·atanio Bihar a·dokni Chief Minister Nitish Kumar aro dingtang dingtang opposition dolni dilgiparangba bakko ra·e jinmana aganprakanggen.
Ia tom·anio Bihar a·dokni Chief Minister Nitish Kumar, uko dakchakenggipa Tejashwi Yadav aro dingtang dingtang opposition dolni dilgiparangba bakko ra·anggen ine INLD-ni dilgipa Abhay Chautala parakataha.
Chautala-ni parakatani gitade, ia tom·bimonganiona Nationalist Congress Party (NCP)-ni president Sharad Pawar, National Conference-ni president Farooq Abdullah, Shiromani Akali Dal-ni dilgipa Parkash Singh Badal, Samajwadi Party-ni president Akhilesh Yadav, uni pagipa Mulayam Singh Yadav aro Meghalaya a·dokni Governor Satya Pal Malik-koba INLD-ni president OP Chautala okamatenga.
Indake ong·engon, ia jinma tom·bimonganiko ong·ataniona uamang, Telangana-ni Chief Minister K Chandrashekar Rao, TDP-ni president Chandrababu Naidu aro West Bengal-ni Chief Minister Mamata Banerjee-koba okamatgen ine INLD-ni dilgipa Abhay Chautala parakataha.
Batanggimin somoirango, Meghalaya a·dokni Governor Satya Pal Malik, a·songni Prime Minister Narendra Modi-ni kosako bang·en matnanganirangko dakahachim ine nikna man·a.