TURA: North Garo Hills a·jani Mendipathar Police Station-ni ning·o dingtang dingtang songni Nokmarang, Sordarrang aro dingtang dingtang dilgiparangna, ‘Human Trafficking’ ba mande badingsrukani bidingo agan-talate on·na gita adita salrangna skang, North Garo Hills a·jani Police dol, North Eastern Frontier Railway baksa nangrime awareness program-ko Mendipathar Railway Facilitation Centre-o ong·atangaha.
Ia program-ko ong·atanio Western Range-ni Deputy Inspector General of Police CV Subba Reddy, mongsonggipa sokgipa ong·e bakko ra·angaha aro ia tom·anio ua jinmana aganprakangengon, mande badingsrukaniko champengna gita pangnan mikrake kamko ka·china aro police-rang baksa nangrime kam ka·china, songni nokni dilgiparangko didiangaha.
Banoba mande rim·srukani ba uandake badinge cha·anirangko nikgenchim ong·ode ta·raken uarangni bidingo police-rangna u·iatchina gitaba Western Range-ni DIG didiangaha.
Ia awareness program-ko ong·atanio dingtang dingtang police officer-rang aro gipin official-rangba dongpae songni nokni dilgiparangna agan-ku·pattie on·angaha.
