TURA: Re·anggipa September 8 tarikoni 10 tarikona, A·chik Literature Society (ALS), Tura Don Bosco College-ni Garo Department baksa nangrime, Regional Writers’ Workshop-ko Tura-ni Don Bosco College-o ong·atangaha aro ia salgittamna ong·atanggipa workshop-o Don Bosco College, ICFAI University aro NEHU Tura Campus-o poraienggipa chatro chatrirangko man·chape gimik sak 234 sea jotanio gisik nanggipa manderang, register ka·e bakko ra·angtokaha.
Ia workshop-ko matchotatani salo, NEHU Tura Campus aro ICFAI University-ni gitcham Pro-Vice Chancellor Prof Milton S Sangma, mongsonggipa sokgipa ong·e workshop-o bak ra·giparangna aganprakangengon, sea jotanio gisik nanggipa manderangna aro mongsongbate chatro chatrirangna iandakgipa workshop-rangko ong·atanichi A·chikkuo sea jotanio gisik nanggipa manderangko bang·batatgen ine an·tangni ka·dongchakenganiko parakangaha.
A·chikkuchi sea jotanirangko bang·batroroate, A·chikkukoba Indian Constitution-ni Eighth Schedule-o napatna gita kamrangko ka·angkuna ineba ua ku·monganiko on·angaha.
Ia program-ko ong·atanio A·chik Literature Society-ni vice president Giribala G Momin-ba jinmana aganprakangengon, A·chikkuchi sea jotaniko ranta ka·china gita chatro chatrirangko didiangaha.
Ia salgittamna workshop-ko ong·atanio, chatro chatrirangna aro sea jotanio gisik nanggipa manderangna agan-skie on·anggipa manderangara, NEHU Tura Campus-ni ning·o donggipa Garo Department-ni Associate Professor Dr Dokatchi Ch Marak, ALS-ni vice president Basan R Marak aro NEHU Tura Campus-ni ning·o donggipa Garo Department-ni Assistant Professor Dr Crystal Cornelious D Marak ong·a.
Workshop-ni bon·kamgipa salo, bak ra·giparangna ALS-ni vice president Giribala G Momin, Don Bosco College-ni ning·o donggipa Garo Department-ni Head Nicholas M Sangma aro golpo serakgipa Wilberth D Marak-ni jakchi certificate-rangko suale on·angaha.
