SHILLONG: Inner Line Permit (ILP)-na a·dok sorkarini resolution pass ka·gipani bidingo ma·mongni Ministry of Home Affairs (MHA) aganchakaniko on·kujaenga ine Sombar salo, a·dokni Chief Minister Conrad Sangma, Assembly-o parakataha.
Sombar salo, Autumn Session-ni gnigipa salo, Nongpoh-ni MLA Mayralborn Syiem-ni sing·anina Chief Minister, ia kattarangko aganaha.
“ILP-ko ra·gatani bidingo MDA sorkariba, gisik nanganiko mesokna gita Assembly-o resolution-ko pass ka·aha indiba ian da·o MHA-ni jakosa ong·kuengani gimin a·dok sorkari, MHA-ni aganchakaniko sengna nangkuenga,” ine Chief Minister parakataha.
Chief Minister-ni parakatani gitade, re·anggipa bilsini February 23 tariko Union Home Minister Amit Shah-ni a·dokona re·baani somoion ILP aro dingtang dingtang nanganirangna a·dok sorkari, memorandum-ko on·atmanahachim.
Meghalaya a·doko ILP-ko ra·gatchina gita dingtang dingtang dolrang dabiani ja·man a·dok sorkari, 2019 bilsini December 19 tariko, Assembly-o resolution-ko pass ka·e donangahachim ine nikna man·a.
A·dok sorkarini pass ka·gipa resolution-ko 2019 bilsini December 23 tarikon Ministry of Home Affairs-na watatmanahachim ine janapatengon, iani ja·manoba a·dok sorkari, 2020 bilsini November 17 tariko MHA-na chittiko seatenba agangrikattaiahachim ine Chief Minister parakataha.
Chief Minister-ni parakatani gitade, salgro salaram jolrango jegalenggipa Citizenship Amendment Act (CAA)-ko ma·mong sorkarini ra·gatani ja·man, Meghalaya a·doko dingtang dingtang dolrang, ia CAA-ko jegalenba, ILP-na dabianiko bilakbattaiaha.
“2020 bilsini February 20 tariko a·dokni MLA-rangba, Union Home Minister-ko New Delhi-o grongeaha aro ua tom·anio MLA-rangna, Meghalaya Legislative Assembly-o pass ka·gipa resolution-ko ma·mong sorkari niengkua ine Home Minister parakatenba, a·doko songdongenggipa Tribal-rangna on·gimin bilrangko gimaatjawa ine ku·rachakaniko on·ataha. Re·anggipa 2021 bilsio dolsni NGO-rangni membor-rangba union home minister-ni a·dokona re·baani somoio a·doko ILP-ko ra·gatna nangchongmotengani gimin agangrikangaha aro uamangko home minister, Delhi-ona okamate agangrikna ku·rachakaniko on·angahachim,” ine Chief Minister parakataha.