TURA: North Garo Hills a·jani Dainadubi-o donggipa Fruit Processing Centre-ko a·dok sorkarini Private-Public Partnership (PPP) mode-ona ra·gataniko jegalna gita Mongolbar salo North Garo Hills a·jani dingtang dingtang dolrang, jekai GSU, DCYO, AIJIF, AAYF, FKJGP, ADE, DEO, Mothers Union, MKJDO aro uandakgipa dolrang, jinma tom·bimonge re·jomaniko ong·atangaha aro ia re·jomanio dingtang dingtang skul aro college-rango poraienggipa chatro chatrirang aro jolo songdongenggipa manderangba bakko ra·angtokaha.
Dainadubi-o donggipa Fruit Processing Centre-ko PPP mode-o ra·gatani gimin sorkarini kamko jegaltokengon, ia processing centre-ko chalaina on·gipa tender-ko ra·galpilchina, sorkarini kuligipa office-ko songpiltaichina aro officer-rangni tangka jakkalsretanirangko Special Investigation Team (SIT)-ni inquiry dakchina dingtang dingtang dolrang aro tom·e re·jomanio bak ra·gipa manderang dabiangtokaha.
“Ia fruit processing centre-ko PPP mode-ona ra·gatani bidingo chinga batanggimin June jamangonin a·dokni Chief Minister aro dingtang dingtang minister-rangna sedoatahachim indiba da·alonan maming ja·kurangko de·kujaenga. Ia office-ko namdapatani pal a·dok sorkari, ia processing centre-ko PPP mode-ona ra·gatskana jotton ka·enga aro iako chinga North Garo Hills a·jani manderang maming dakeba ra·chakna man·jawa,” ine jinma tom·e re·jomanio bak ra·anggipa dingtang dingtang dolni dilgiparang parakataha.
Iani bidingo ta·raken kamrangko niate, Garo Hills-o songdongenggipa manderangni namgnina ja·kurangko de·china gitaba North Garo Hills a·jani dingtang dingtang dolrang, a·dokni Chief Minister Conrad K Sangma-ko didiataha.
NGH-ni Processing Centre-ko PPP-ona ra·gataniko jegale jinma tom·e re·joma
Date:
Share post:
