SHILLONG: Meghalaya Public Service Commission (MPSC)-ni ning·o bangbang ong·e dongenggipa ge 1301 kamrangko gapatna gita kamrangko ka·engaha ine Mongolbar salo, a·dokni Chief Minister Conrad K Sangma, Assembly-o parakataha.
“Bangbang ong·e dongenggipa kamrangko gapatna gita kamrangko ka·engaha aro ia kamrangna porikka aro interview-rangko ta·raken ong·atna chinga ku·rachakenga,” ine Sangma aganaha.
MPSC-ni kamna interview-rangko ra·anio somoi ra·chae dongrongengani Mawlai-ni TMC MLA PT Sawkmie-ni sing·anina Chief Minister, ia kattarangko aganaha.
Enforcement inspector aro uandakgipa dingtang dingtang kamrangna porikkarangko ong·atningjaengani gimin Shangpliang-ni sing·anina aganchakaniko on·angengon, batanggimin bilsigni ba bilsi gittamni gisepo COVID-19 sabisirang giproroahani a·selba kamrangko ka·anio neng·nikanirangko chagrongna nangaha ine Chief Minister talataniko on·angaha.
“COVID-19-ni somoirango MPSC-ni kamrangko ka·anio bang·en neng·nikanirangko chagrongna nangahani a·sel bangbang ong·e dongenggipa kamrangko gapatna man·jaha. Indiba chinga ia kamrangko ta·raken gapatna kamrangko ka·engaha,” ine Sangma aganaha.
Meghalaya a·doko MPSC-ko namdapatna gita a·dok sorkari cholrangko nienga ineba Chief Minister parakataha.
