SHILLONG: Meghalaya a·dokni Garo aro Khasi ku·sikrangkoba Constitution-ni Eighth Schedule-o napatchina dabianiko ma·mong sorkarina bilakbate mesokna man·na gita Assembly-o MLA-rangko Garo aro Khasi ku·sikrangchiba aganna cholko on·china gita Budbar salo, a·dokni Chief Minister Conrad K Sangma Assembly-o didiangaha.
Chief Minister Conrad Sangma an·tangan Garo aro Khasi ku·sikrangko Assembly-o aganenba, Assembly-o ia ku·sik minggnikoba jakkalna on·china Assembly-ni Deputy Speaker Timothy D Shira-ko didiangaha.
Garo aro Khasi ku·sikrangko Eighth Schedule-o napatchina dabienggipani bidingo aganchakengmiting somoio a·dokni Chief Minister, ia cholko ra·enba, Assembly-o MLA-rangkoba Garo aro Khasi ku·sikchi aganna cholko on·china didiangaha.
“Assembly-ni membor-rang pilakkon Garo aro Khasi ku·sikchi aganna on·china anga mol·molenga. Ian an·chingni Garo aro Khasi ku·sikrangko Eighth Schedule-o napatchina dabianio kim·kim ong·aniko ma·mong sorkarina mesokaniba ong·gen,” ine Sangma aganaha.
Garo aro Khasi ku·sikrangko Eighth Schedule-o napatchina dabiani bidingo ua India sorkarini dingtang dingtang dilgiparang baksa agangrikaha ineba Chief Minister parakataha.
Garo aro Khasi ku·sikrangko Constitution-ni Eighth Schedule-o napatchina ma·mong sorkariko didie, Meghalaya Assembly-o dingtangmancha resolution-koba pass ka·manahachim ine nikna man·a.
Assembly-ni Autumn Session-o Nongpoh-ni MLA Mayralborn Syiem-ba Khasi ku·sikchi aganna bi·ahani gimin una aganna gita Assembly-ni Deputy Speaker TD Shira, cholko on·aha.
