WILLIAMNAGAR: East Garo Hills a·jani skul dambrio, bilsi gittam ong·na sipile skigiparang dongjaengani a·sel skulo poraienggipa bi·sarang lekka pora gri ong·e dongna nangtokenga ine kobor on·aha.
Koborko on·ani gitade, East Garo Hills a·jani Koknal Imong Government LP skulo sak 80-na baten poraienggipa bi·sarang dongachim indiba batanggimin bilsigittamna kingking ia skulo skigiparang dongjani a·selan bi·sarang lekka pora gri dongna nangtokenga. Apsan daken, Danal Bolgipok Government LP skuloba sak 32-na baten poraienggipa bi·sarang dongachim indiba ia skul batanggimin bilsibrina kingking skigipa gri ong·e dongenga.
Sokadam Balading Government LP skuloba ia bilsi a·bachengonin skigipa dongjani a·sel skulo poraienggipa bi·sarang, lekka pora gri ong·e dongna nangtokengaha ine kobor on·timgiparang parakataha.
Indake ong·engon, Dobu Achakpek skuloba batanggimin bilsibrina kingking skigipa dongjani a·selan chatro chatrirang neng·nikanirangko chagrongna nangtokengachim indiba da·o saoba mande saksa ia skulo skie on·skaengaha ine SDSEO kobor on·aha.
Koborko on·ani gitade, Samanda C&RD block-ni ning·oba apsan daken skigipa gri ong·e dongenggipa skul damsa gnang.
Kosako janapgimin skul dambriara Songsak Block-ni ning·o ga·akgipa skulrang ong·skaachim, jeon a·dokni gitcham chief minister aro Opposition dolni dilgipa Mukul Sangma, MLA ong·engachim.
Ia skulrango skigiparang dongjaengani gimin East Garo Hills a·jani SDSEO Johnsen Momin-o sing·sandiaton, ia skulrango skigiparang mitamde kamoni neng·takangaha aro mitamrangde gipin biaprangona transfer ra·e re·angtokaha ine parakataha.
