SHILLONG: A·dok sorkarini ja·ku de·aniko dingtang dingtang dolrang aro a·doko songdongenggipa manderang jegalgrimtokani ja·man, a·doko songdongenggipa manderangni nangnikani gride casino-rangko kulina on·jawa ine Bristibar salo, a·dokni Chief Minister Conrad K Sangma parakataha.
Bristibar salo, NPP-ni program-ko ong·atanio iani gimin janapatengon, Shillong aro a·dokni dingtang dingtang biaprango dongsogimin joa kal·chakram biaprango indita bilsirangna maming niamrangko donsoa gri chalaiengani giminsa niamrangko tarina gita Gaming Act-ko ra·gatahachim ine Chief Minister parakataha.
Chief Minister-ni parakatani gitade, niamrangko ra·gatani ja·man, songjinmarangoni chel·kala biaprango online aro offline gaming-rangko a·bachengatanichi a·dokna kajinarangko man·dapna miksongani gnangsa sorkari ia ja·kuko de·ahachim indiba iani bidingo dingtang dingtang mondolirang aro dingtang dingtang dolrang, name chanchichengchina gita seatahani gimin sorkari name chanchipiltaie ja·kuko de·skaengaha.
“Dingtang dingtang mondoli aro dolrangni chingna seatani ja·man chinga iani bidingo chanchirimtaina tik ka·angaha aro manderang jegaltokengani gimin manderangni nangnikgijanikode jako ra·jana manchiangaha,” ine Sangma aganaha.
Je manderangnan provisional licence-rangko on·ahachim, uarangba dongimin somoi gitan bon·aigen ine talataniko on·angengon, uni ja·manode ia licence-rangko taridape on·taiani dongjawaha ine Chief Minister parakataha.
