SHILLONG: Tura medical college-ko rikani kamrang da·o 33 percent matchotengaha aro kamrangko re·baenggipa 2023 bilsini February jaon matchotatchina gita kamko jako ra·e ka·enggipa company-na somoiko on·dapaha ine Bristibar salo, a·dokni Health Minister James K Sangma parakataha.
Health Minister-ni Assembly-o parakatani gitade, Tura medical college-ko rikani 33 percent matchotaha aro da·o dipet ia kamrangna koros ong·ani 17 percent gapengaha.
“Tura medical college-ko 2021 bilsini January 27 tarikon matchotatna gita somoiko donahachim indiba COVID-19 aro gelna man·telgijagipa dingtang dingtang a·selrangchi kamrangko ka·anio champengatako man·aha. Ia medical college-ko rikenggipa dol, somoiko bi·dapahani gimin kamrangko matchotatchina gita chinga 2023 bilsini February 7 tarikona somoiko on·dapaha,” ine Sangma aganaha.
Sangma-ni parakatani gitade, Tura medical college-na chame dongimin korosara gong kror 243.82 ong·achim aro ianoni gong kror 172-kode India sorkarioni on·atna siengachim.
“Da·o dipet Tura medical college-ko rikanio gong kror 41 koros ong·aha aro ian 17 percent gapenga,” ine ua aganaha.
Shillong medical college-ni bidingo Nongkrem-ni MLA Lambor Malngiang-ni sing·anina aganchakaniko on·angskaengon, Shillong medical college-ko rikna soi ka·grikgimin MoU-ko sorkari den·galpilaha aro da·o ia college-ko PPP mode-o chalaina gital party-rangko okamskaengaha ine Sangma parakataha.
Ia project-na a·dok sorkari, New Shillong Township-o dingtangmancha acre 50 a·arangko kange donmanaha ineba Health Minister parakataha.
