SHILLONG: Batanggimin 2020 April jaoni intal a·doko COVID-19 sabisiko dakgrikchakna gita ja·ku ga·anio kror 816 koros ong·gipani bidingo mijal State Assembly-o sing·doanirang nakataha, jeon kror 816-oniko kror 160-kode batanggimin jadokni gisepo jakkalahahchim.
A·dokni health sector-ni obostarangni bidingo Umroi constituency-ni Opposition TMC MLA, George B Lyngdoh sing·doaniko dakengon, covid sabisiko dakgrikchakanio kror 1000 batpile koros ong·anide dugapilaha haida ian a·songni gisepo koros ong·batgiparangoni mingsa ong·gnokkon, Lyngdoh aganaha.
Indita koros ong·anirangkode a·dokni manderangan bebera·na neng·pilgnok ineba ua aganaha.
Unaskang Health Minister James PK Sangma House-o indake parakatahachim je a·dok sorkari da·alona, Gong 816,22,52,312 tangkarangko COVID-19 sabisina jakkalaha. Uanoniko a·dok sorkari, Gong 739,66,34,312 ko koros ka·aha aro Gong 76,56,18,000 korosrangko Ma·mong gamaha.
Ia koros gimikoniko Gong 49,98,09,560-ko nokrik nokdakanio aro dongspa Gong 766,24,42,752 tangkarangko gipin kamrangna a·dok sorkari jakkalaha.
Unomitingo sabisi sajinmako dakgrikchakna gita A·dok sorkarini aroba health worker-rangni kam ka·anina Mawlai MLA PT Sawkmie kusi ong·chakaniko parakangaha.
Indake ong·engon kror 816 tangkade namen bang·aha, uni talbate ma·sina man·na gita bak dake mesokchina gitaba ua a·dok sokariko didiangaha.
Unomitingo Health Minister, jean Assemblyo dongjachim uni palo Chief Minister Conrad K Sangma baditako maimairangna koros ka·ahachim, uarangko toktok dake talate on·angaha.
