TURA: Sukrobar salo, West Garo Hills a·jani Education department-ni gita District Level Students Science Seminar-ko Tura Dakkopgre-o donggipa SMELC-o ong·atangaha aro ia seminar-ko ong·atanio dingtang dingtang skulni principal-rang, science teacher-rang aro chatro chatrirang bak ra·angtokaha.
Ia Science seminar-ko ong·atanio Tura-ni gitcham District School Education Officer Subodh Kr Saha, mongsonggipa sokgipa ong·e jinmana aganprakangengon, West Garo Hills a·jao chatro chatrirangni changa sapanirangko mesokna gita seminar-rangko, debate-rangko, quiz competition-rangko ong·atjringenga aro iandakgipa program-rango chatro chatrirang bakko ra·na cholrangko man·enga ine an·tangni kusi ong·aniko parakangaha.
Ia program-ko ong·atani bidingo Tura Don Bosco College-ni ning·o donggipa Chemistry Department-ni Senior Professor Dr Madhusudhan Saha, jinmana talate on·angskaengon, Science-ara mandeni salanti janggi tanganio mongsonggipa bak ong·e, mandeni ma·sie ra·na nanggipa bakan ong·a ine parakangaha.
A·gilsako neng·nikanirangko Science-an namatna man·gipa ong·a ine janapatengon, ia 2022 bilsiko United Nations General Assembly, ‘International Year of Basic Science for Sustainable Development’ ine parakaha ine Saha janapataha.
Ia seminar-ko ong·atanio mongsonggipa ong·e sokgipa mandeni jakchi, dingtangmancha mittelpilani certificate-ko Williamnagar-ni District Science Supervisor aro Tura Government Boys Higher Secondary School-ni gitcham skigipa Samuel K Sangma-na on·angaha.
Ia Science Seminar-ko ong·atanio dongpae jinmana aganprakanggipa gipin manderangara, Tura-ni District Science Supervisor CA Sangma, Joint Director of School Education & Literacy Office-nii SEO Taposh Ch Marak aro gipinrang ong·a.
