SHILLONG: Shillong Medical College & Hospital (SMCH)-ni bidingo a·dok sorkari, a·dokni manderangko togienga ine Sonibar salo, a·dokni gitcham Health Minister aro BJP MLA AL Hek parakataha.
Politician-rang, bilsibongani gisepo changsade manderangko togitelaia ine Deputy Chief Minister Prestone Tynsong-ni agangipa kattarangni gimin gisik ra·atpilaniko on·angengon, ia apsan kamkon a·dok sorkari, Meghalaya a·dokni manderangna dakna jotton ka·engakon ine Hek parakataha.
Shillong medical college project-na KPC Group baksa songgrikaniko a·dok sorkari den·galpilenba, ia project-na New Shillong Township-o a·arangko sandina a·bachengatahachim indiba ia apsan biapon ia project-na a·arangko tik ka·manahachim.
KPC Group baksa songgigrikaniko a·dok sorkari den·galpilaha ine adita salrangna skang, Assembly-ni Autumn Session-o a·dokni Health Minister James PK Sangma-ni agangipa kattarangni gimin janapatskaengon, “Shillong medical college-na pangchakani ro·ongko songe, 2012 bilsion KPC Group baksa MoU-o soi ka·grikahachim. Da·o bilsi 10-ni ja·man ia Group baksa songgigrikaniko sorkari den·galpilskaaha,” ine Hek, suk ong·gijaniko parakataha.
Shillong medical college-ko rikani be·en pil·ama pil·chipjawa darangba ma·sijaenga ineba ua aganaha.
An·tangtangni mikkimko warachakna gita KPC Group, a·dok sorkarini kosako kachariona re·angnaba gnang ine janapatengon, “Uamang kachariona re·angbebegenchimode Shillong Medical College-ni chu·sokaniko anga nikatjaengaha. Indiba uamang indinaride walgaljawa,” ine BJP-ni dilgipa parakataha.
