TURA: Changni chang ku·rachakaniko on·ani ja·manoba North Eastern Hill University (NEHU) Tura campus-na Pro-Vice Chancellor (PVC)-ko da·onan songe on·kujaengani gimin NEHU-ni kosako bilakbate jingjengatanirangko dakangkuna gita Garo Students Union (GSU) CEC, ka·mikkenataniko on·angaha.
GSU-CEC-ni parakatani gitade, NEHU Tura campus-ko 1996 bilsini February jaon kulie on·ahaoba NEHU headquarter-ni gita changsaba Tura campus-o ministerial staff-ni kamrangko nakatate on·a dongkuja aro Tura campus-ko kulichengaonin bang·gija manderangchisa chalaibaengachim.
“NEHU Tura campus-ko kulichengaonin Pro-Vice Chancellor-chisa chalaiengachim indiba ia campus-o 2021 bilsini July ja dipetan PVC dongjae kamrangko ka·anio neng·nikanirangko chagrongna nangtokenga. NEHU Tura campus-na PVC-ko songe on·na gisik nangjaengani gimin GSU-CEC jingjengatanirangko dakna a·bachengaton, 2021 bilsini December jao NEHU-ni Vice Chancellor, Tura campus-ona re·bae GSU baksa tom·e chanchirimangaha aro jasani gisepon PVC-ko songe on·na ku·rachakangahachim. Ia ku·rachakaniko on·ani ja·man jadokni ja·manoba Tura campus-na PVC-ko songe on·chipjahani gimin GSU-CEC, jingjengataniko dakna a·bachengattaion, NEHU-ni VC, 2022 bilsini July 18 tariko Tura campus-ona re·bae GSU baksa tom·e chanchirimtaiaha aro ia changoba ua sal 90-ni gisepon PVC-ko songe on·na gita somoiko bi·dapahachim. Da·o uni bi·gimin sal 90 somoirang bon·angtaiaha indiba da·alonan NEHU Tura campus-na PVC-ko songe on·chipkujaenga,” ine GSU-CEC-ni president parakatenba, iandake NEHU Tura campus-ko headquarter-oni nichanggale mesokaniko jegalna gita bilakbate jingjengatanirangko dakanggen ine mikrakataniko on·angaha.
