SHILLONG: Meghalaya a·dokni damgittam autonomous district council (ADC)-rang, chong·motan Garo Hills Autonomous District Council (GHADC), Khasi Hills Autonomous District Council (KHADC) aro Jaintia Hills Autonomous District Council (JHADC), 2016 bilsioni 2021 bilsiona gimik gong kror 566.93 tangkarangko dingtang dingtang kamrangna ma·mong sorkarioniko man·soahachim indiba ia tangka paisarangoni gong kror 301.28 ba 53 percent-nikosan utilisation certificate (UC)-rangko on·aiaha ine Comptroller & Auditor General (CAG)-ni gital State Finances Audit Report-o parakaha.
Ia tangka paisarangko dingtang dingtang namroro silroroatani kamrangna a·dokni damgittam district council-rang man·soahachim indiba CAG-ni report-o parakani gitade, tangkarangko chu·gimik jakkalani utilisation certificate (UC)-rangko on·gijaniara, indita bilsini gisepo maikai tangka paisarangko jakkalaha aro maina jakkaljaha, uarangko district council-rangni talate on·na man·gijaniko mesokanisa ong·aha.
CAG-ni report-o parakani gitade, 2018-19 bilsio watatgipa gong kror 50.18 aro 2019-20 bilsio watatgipa gong kror 50.18-ni UC-rangko KHADC on·chipkuja aro JHADC-ba 2018-19 bilsio watatgipa gong kror 16.73 aro 2019-20 bilsio watatgipa gong kror 16.73-ni UC-rangko ma·mong sorkarina on·chipkujachim.
Apsan daken GHADC-ba, 2018-19 bilsio watatgipa gong kror 44.60-ni aro 2019-20 bilsio watatgipa gong kror 44.61-ni UC-rangko ma·mong sorkarina on·chipkujaenga ine CAG-ni report-o parakaha.
Meghalaya a·dokni damgittam ADC-rang, baditaba bilsini annual account-rangko Accountant General (Audit)-na on·chipjaha ineba CAG-ni report-o parakataha.
CAG-ni parakatani gitade, KHADC-ni annual account-rangko 2019-20 bilsioni 2020-21 bilsiona, JHADC-ni annual account-rangko 2018-19 bilsioni 2020-21 bilsiona aro GHADC-ni annual account-rangko 2016-17 bilsioni 2020-21 bilsiona Meghalaya-ni Accountant General (Audit)-na submit ka·kujaenga.
GHADC aro JHADC-ni Fund Rules gitade, ia damgni district council-ni annual account-rangko bilsiantian June 30 tarikni gisepon submit ka·na nangachim indiba KHADC-ni Fund Rules-ode annual account-rangko on·ani somoiko tik ka·a dongskajachim.