SHILLONG: Meghalaya a·doko sanna banani kamrangko ka·enggipa manderangna dingtangmancha Tamil Nadu a·dokni gita skie on·na miksonganio Meghalaya sorkari aro Tamil Nadu sorkarirang, Sombar salo Memorandum of Understanding (MoU)-o soi ka·grikangaha.
Meghalaya a·dokni pal Health-ni Principal Secretary Sampath Kumar aro Tamil Nadu sorkarini pal Health-ni Principal Secretary Dr P Senthil Kumar, MoU-o soi ka·angaha aro soi ka·grikani somoio Meghalaya a·dokni Health Minister James PK Sangma-ba dongpae, Tamil Nadu-ni Medical & Family Welfare Minister Ma Subramanian-koba grongjolangaha.
Ia soi ka·grikani somoio Meghalaya a·dokni Health Minister, jinmana aganprakangengon, Meghalaya a·doko sanna banani kamrangko nambatatna gita ia ja·kuko de·ahani gimin Tamil Nadu sorkariko mittelpilangaha.
Tamil Nadu a·doko Health Minister Ma Subramanian-ni dilanichi sanna banni a·bao kam ka·anirang namengani gimin Meghalaya a·dokni Tamil Nadu sorkari baksa soi ka·grikaniara Meghalaya a·dokna bang·en namgniko ra·bagnok ineba Sangma parakataha.