BAGHMARA: Re·anggipa Sonibar salo, South Garo Hills a·jani District Legal Services Authority (DLSA), District Administration aro Health Department baksa nangrime, Health Camp aro Awareness program-ko Baghmara-ni District Sports Playground-o ong·atangaha aro ia program-ko ong·atanio Meghalaya High Court-ni Chief Justice Sanjib Banerjee, mongsonggipa sokgipa ong·e bakko ra·angaha.
Ia program-ko ong·atanio Meghalaya High Court-ni Chief Justice, jinmana aganprakangengon, sorkarini ra·gate on·gipa dingtang dingtang scheme-rang bang·en donga indiba ia scheme-rangara manderangni janggi tanganio maming namgnirang dongjaenga ine scheme-rangko ra·gatengon manderangna namgni ong·na gitasa ra·gatchina didiangaha.
Me·chikrangni kosako ong·gija dakanirang batroroengani gimin janapatskaengon, darang niamon me·chikrangni kosako ong·gija dakna on·gimin bilrang dongja ine me·chikrangni kosako ong·gija dakanirangko jegalchina gita Banerjee, jolo songdongenggipa manderangko didiangaha.
Meghalaya a·doko drugs ba pekatgipa samrangko jakkalani komiangahaoba, chadamberangko iandakgipa kamrangoniko chel·chakna gita mikrakatanirangko on·angkuchina Meghalaya High Court-ni Chief Justice didiangaha.
Ia program-ko ong·atanio Meghalaya High Court-ni Judge, Justice HS Thangkhiew-ba dongpae jinmana aganprakangengon, a·songo songdongenggipa mande sakantian namgipa rama, ringani chi, namgipa cha·ani ringani, sanna banani, lekka porani aro uandakgipa sorkarini kamrangko man·na nanga ine parakangaha.
Ia tom·anio Social Welfare department-ni Secretary E Kharmalki-ba dongpae jinmana aganprakangengon, Social Welfare department-ni ning·o ra·gate on·gipa dingtang dingtang scheme-rangni gimin talataniko on·angenba, be·enni gita cholgri ong·gipa chatro chatrirangnaba ia department, dingtangmancha scholarship-rangko ra·gataha ine parakangaha. Ia scheme-oniko sak 1083-na baten chatro chatrirang namgniko man·aha ineba ua aganaha.
Ia program-ko ong·atanio dongpae, dingtang dingtang kamrangni bidingo manderangna agan-talate on·anggipa gipin manderangara, Labour department-ni Joint Secretary ZJ Sangma, Education department-ni Secretary A Ch Marak, Baghmara-ni District & Sessions Judge aro DLSA-ni Chairperson G Rani, Baghmara-ni Additional DM&HO Dr Sima Celina Sangma aro gipinrang ong·a.
