TURA: Meghalaya a·dokni Director General of Police (DGP) Dr Lajja Ram Bishnoi, re·anggipa September 18 aro 19 tarikrango East Garo Hills a·jaona re·bae, police-rangni kamrang baksana dingtang dingtang biaprangonaba re·ange, dingtang dingtang kamrangko niangjolaha.
September-ni 18 tariko ua, East Garo Hills a·jani Superintendent of Police (SP)-ni office-o a·jani police officer-rang baksa tom·e, police officer-rangni kamrangko nipilangaha aro kamrangko nambate ka·china gitaba police officer-rangko didiangaha.
Gnigipa sal, chong·motan September-ni 19 tariko ua East Garo Hills a·jani Nengmandal Fish Sanctuary-ko niangan baksana songni nokni Nokmarang baksa tom·e agangrikangaha.
Uni ja·mano Dr Bishnoi, Williamnagar-ni Loyola School-onaba re·ange dingtangmancha skulo poraienggipa chatro chatrirangna agan-ku·pattianirangko on·angaha.
