RDAP Farm aro NEHU-ni ramarangko tarichina PGSU dabia

TURA: North Eastern Hill University (NEHU) Tura campus-ni ning·o donggipa M.Sc Rural Development of  Agriculture Production (RDAP) department aro NEHU Tura campus-ni dingtang dingtang ramarangko namdapatchina dabie, mijal Mongolbar attamo Post Graduate Students Union (PGSU), NEHU-ni Vice Chancellor Prof Prabha Shankar Shukla-ko grongenba memorandum-ko on·angaha.
PGSU-ni parakatani gitade, NEHU Tura campus-ni RDAP department-o dingtang bagan aro poraienggipa chatro chatrirangna skie ra·ani dingtang dingtang cholrang dongachim indiba ia baganona Arbella Hostel-oni dakanggipa rama namsrangjahani a·sel chatro chatrirang, NH-51 rama gitasa re·na nange neng·nikanirangko chagrongna nangtokengachim.
“Arbella Hostel-oni RDAP farm-ona dakanggipa ramako name tarie on·genchimode chatro chatrirang altubate re·ruraenba, skie ra·na man·gen,” ine PGSU-ni dilgiparang, NEHU-ni Vice Chancellor-na sedoatgipa chittio parakataha.
RDAP farm-o bosturangko donchakani biap ba godown-ko rike on·china, RDAP farm-o tarigija galchipe donenggipa greenhouse-ko taripile on·china, RDAP-ni chatro chatrirangna miksonge tarigimin fishery pond aro piggery-ko gital dake tarie on·china aro RDAP farm-ni gate baksana agriculture field-ko tarie on·china gitaba PGSU didiangaha.
Indake ong·engon, NEHU Tura campus-ni ning·o donggipa dingtang dingtang ramarang, jekai NEHU Lake Road, NEHU Guest House Road, RDAP Farm Road, Playground road, Horticulture Farm road, Arbella Hostel junction-oni main road-ona dakanggipa ramarangkoba tarie on·china PGSU, NEHU-ni Vice Chancellor-ko didiataha.