SHILLONG: NPP-chi dilenggipa MDA sorkario bakrimaniko Meghalaya a·doko BJP-ni pilak membor-rangan watna nangniktokenga indiba ma·mongni BJP dilgiparangsa bon·kamgipa chanchianikode dakgen ine BJP Meghalaya-ni state president Ernest Mawrie parakataha.
“MDA-o bakrimaniko watani bidingo chinga pilakan ku·cholsan ong·e namniktokaha aro pilakan an·tangtangni committee-rangoba iani gimin chanchitokaha. Iani bidingo ma·mongni dilgiparangna u·iatmanaha aro uamangsa chanchie ja·kuko de·gen,” ine Mawrie, kobor ra·timgiparangna parakataha.
Meghalaya a·doko BJP dol, jasani gisepon MDA-oni ong·katnaba gnang ine re·anggipa September-ni 3 tarikosan BJP-ni Meghalaya in-charge aro national vice president M Chuba Ao parakatahachim ine nikna man·a.
Indake ong·engon, ian Ao-ni parakatgipa kattarangsan ong·aia aro iani giminde ua mamingkoba ma·sija ine BJP-ni state president Mawrie parakatskaaha.
MDA-ni ong·gijagipa kamrangni gimin Enforcement Directorate (ED) aro Central Bureau of Investigation (CBI)-ni sandiroktna gita MDA sorkarini kosako sakkirangko chimongengaha ineba Ao parakatahachim.