USTM-ni chang 8-gipa Convocation-ko ong·atanga

SHILLONG: University of Science & Technology Meghalaya (USTM)-ni changchetgipa Convocation-ko mijal Mongolbar salo ong·atangaha aro ia Convocation-o Hyderabad University-ni Vice Chancellor Prof BJ Rao aro dingtang dingtang university-ni Vice Chancellor-rang aro official-rangba bak ra·angtokaha.
USTM-ni changchetgipa Convocation-ko ong·atanio gimik sak 1305 graduate-rangna degree-rangko on·angaha aro ianoni sak 15-nade Ph.D degree-ko, sak 775 chatro chatrirangnade Post Graduate degree-ko aro sak 515 chatro chatrirangnade Undergraduate degree-ko on·angaha.
Ia convocation-ko ong·atanio Assam Downtown University-ni Founder aro Chancellor Dr NN Dutta-na Honorary Doctorate of Science (D.Sc)-ko aro Shillong Times songbadni gitcham Editor baksana Meghalaya a·dokni gitcham Education Minister Padma Shri Manas Chaudhury-na Honorary D.Litt. degree-ko Meghalaya a·dokni Governor aro USTM-ni Visitor Satya Pal Malik-ni jakchi on·angaha.
Ia Convocation-ko ong·atanio Hyderabad University-ni Vice Chancellor Prof BJ Rao, chatro chatrirangna aro skigiparangna aganprakangengon, ia sal somoirango mitam kamrangnade university degree-mangmangde choligipa ong·jahani gimin gital kolrang baksa u·i-ma·sianirangko bariatna gitaba nangengaha ine chatro chatrirangko didiangaha.
A·songna aro songsalna dangdike on·anio an·tangtangni daitorangko ma·sie ra·china gitaba ua chatro chatrirangko didiangaha.
USTM-ni convocation-ko ong·atanio Meghalaya a·dokni Governor aro USTM-ni Visitor Satya Pal Malik-ba jinmana aganprakangengon, USTM-ni Founder aro Chancellor Mahbubul Hoque-ni ia jolrango donggipa manderangna a·gilsakni seng·aniko on·na gita niksamsoani gnang kam ka·ani a·selsa da·alo USTM chu·sokgipa ong·e ine parakangaha.
Ia convocation-o dingtang dingtang upattirangko man·gipa official-rang aro chatro chatrirangnaba ua an·tangni namgipa skaniko parakangaha.
Ia convocation-o dongpae bakko ra·anggipa gipin manderangara, Meghalaya a·dokni Education Minister Lahkmen Rymbui, Manipur University-ni Vice Chancellor Dr N Lokendra Singh, Assam University-ni Vice Chancellor Dr RM Pant, Arunchal Pradesh a·doko donggipa Rajiv Gandhi University-ni VC Prof Saket Kushwaha, Tezpur University-ni gitcham VC Dr VK Jain, USTM-ni Chancellor Mahbubul Hoque aro USTM-ni VC Prof GD Sharma ong·a.