RESUBELPARA: Budbar salo, a·dokni Chief Minister Conrad K Sangma, Rural Backyard Piggery Scheme ba jekon ‘Progress’ ine mingskaahachim, ia program-ni ning·o North Garo Hills a·jani damgittam block-rango donggipa sak 500 manderangna gimik mang 2000 wak bi·sarangko suale on·angaha.
Ia wak bi·sarangko suale on·angani somoio a·dokni Chief Minister, jinmana aganprakangengon, bilsiantian a·doko metric ton 18,000 wak be·enrangko cha·engani gimin bilsio gong kror 630-ko koros ka·na nangenga ine parakataha.
A·doko man·enggipa wak be·enrangoni 50 percent-de gipin a·dokrangonikosa ra·bagipa wakrangsa ong·enga ine janapatengon, iana bilsiprakon gong kror 315-mangkode koros ka·skana nangenga ine Chief Minister parakatenba, iandake a·doko wak be·en chu·onggijaniko aro tangka paisa koros ong·aniko komiatna gitasa sorkari ‘Progress’ scheme-ko a·bachengataha ine talataniko on·angaha.
A·dok sorkarini ra·gate on·gipa Piggery Mission-ni gimin janapatengon, ia program-ko dingtang dingtang cooperative society-rang gita a·bachengatenga aro iako manderang an·tangtangni namgnina ra·na man·gen ine Sangma parakataha.
“Sorkarini ra·gate on·gipa ‘Progress’ scheme-ara game ge·e cha·enggipa aro songni nokni manderangna jilla kaanirangchi janggi tangani cholrangko on·na ra·gate on·gipa scheme ba program ong·a aro ian a·doko wak be·enrangni chu·onggijaniko namatna aro komibeoba sak 10,000 kangal cholgrirangna namgnirangko ra·gatgipa program ong·a,” ine Sangma aganaha.
Ia program-ni ning·o seokako man·gipa mande sakprakna wak mangbri ka·e, chong·motan bima manggittam aro bipa mangsa ka·e wak bi·sarangko sualengachim.
