RESUBELPARA: North Garo Hills a·jani Kharkutta jolrango seokako man·gipa dingtang dingtang producer group (PG)-ni member-rangna Budbar salo, a·dokni Chief Minister Conrad K Sangma-ni jakchi Farmers Collectivisation for Upscaling Production & Marketing System- Plus (FOCUS+) program-ni card-rangko suale on·angaha aro ia tom·aniko ong·atanio Resubelpara-ni MLA aro Assembly-ni Deputy Speaker Timothy D Shira baksana Kharkutta-ni MLA Rupert Momin aro Bajengdoba-ni MLA Pongseng Marak-ba dongpae bak ra·angaha.
Ia FOCUS+ program-ni card-rangko suale on·angani somoio a·dokni Chief Minister, jinmana aganprakatengon, ia program-ni ning·o a·dokni game ge·e cha·giparangna tangka paisani gita dakchakanirangko on·angkuna gita a·dok sorkari, bilsio gong kror 250 tangkarangko chamgen ine parakataha.
FOCUS+ program-ko a·bachengataoni da·o bilsigni gapengaha ine janapatengon, ia program-ni chu·sokenganiko nike sorkari, ia program-ko bilsi 10-na ra·dodapangkuna tik ka·aha ine Sangma parakataha.
Da·o dipet ia FOCUS aro FOCUS+ program-rangara a·doko dal·batsranggipa program ong·enga ine janapatengon, ia program-ni ning·o gama ge·ani kamrangna tangka paisarangko chame on·anichi game ge·e cha·enggipa manderangni janggi tanganio dingtanganiko nikna man·enga ine Chief Minister parakataha.
Ia FOCUS+ program-ara, Producer Group (PG)-ni membor sakprakna gong 5000 ka·e tangka paisarangko dakchakaniko on·na gita a·dok sorkarini ra·gatgipa program ong·a aro ian a·doko game ge·e cha·enggipa manderangko dakchakna sorkarini ra·gatgipa FOCUS program-ni ra·dodapatgipa program ong·engachim.
