TURA: North Garo Hills a·jani Dainadubi jolrango songdongenggipa manderangna nambate sanna bananirangko on·na man·na gita Dainadubi primary health centre (PHC)-ko community health centre (CHC)-ona ra·doatchina aro ia jolna 108 Service Ambulance-ko on·china Dainadubi jolo donggipa dingtang dingtang NGO-rang, a·dokni Chief Minister Conrad Sangma-ko mol·molataha.
Iani bidingo Dainadubi jolo donggipa dingtang dingtang dolni dilgiparang, Budbar salo Chief Minister-ni North Garo Hills a·jaona re·anganio uko grongrikenba memorandum-ko on·ataha.
Chief Minister-na seatgipa chittio NGO-rangni parakatani gitade, Dainadubi PHC-na gital rikgipa building matchotahachim indiba ia PHC-o nangchongmotgipa bosturangko donkujaengachim.
“Uni gimin ia gital rikgipa building-ko CHC-ona ra·doate jolo songdongenggipa manderangna nambata sanna bananirangko on·china chinga mol·molenga,” ine Dainadubi-ni dingtang dingtang NGO-rang parakataha.
Dainadubi jolna 108 ambulance-ko on·china didiatengon, da·o dipet 108 ambulance Resubelpara-osan dongkuengani a·sel ian jol gimikkode nirok sandina man·jaenga ine NGO-rang parakatenba, Dainadubi joloba 108 ambulance-ko donatchina Chief Minister-ko mol·molataha.
Indake ong·engon, Dainadubi PHC-o Trauma Centre-ko donchina gitaba NGO-rang, Chief Minister-ko didiataha.
“Dainadubi PHC-ara bilsi gimik gari gorarangni re·ruragipa biapo ong·ani gimin ia PHC-o Trauma Centre-ko nangenga,” ine NGO-rang parakataha.
Dainadubi PHC-ko CHC-ona ra·dochina aro 108 ambulance-ko on·china NGO-rang dabia
Date:
Share post:
