TURA: Ia sal somoirango mongma aro manderangni gisepo a·sel ong·anirang batroroengani gimin iandakgipa biaprango dolgninan naljokaniko on·na man·na gita Bristibar salo, West Garo Hills a·jani Meghalaya Forest Department, Aaranyank aro British Asian Trust baksa nangrime salsani workshop-ko Tura-ni Circuit House-o ong·atangaha.
Mongma aro manderangna naljokaniko on·na man·na gita dingtangmancha salgro salaram a·dokni dingtang dingtang biaprangko seoke, Forest department-ni gita project-ko ra·gatengachim ine nikna man·a.
West aro North Garo Hills a·jani seokgimin songrangoba mande aro mongmarangni gisepo a·sel ong·anirangko champengna gita Forest department, dingtangmancha ja·kurangko de·chakatengachim.
Ia workshop-ko ong·atanio West Garo Hills a·jani Deputy Commissioner Swapnil Tembe, tom·anio bak ra·giparangna aganprakengon, songadam nokadamrango iandake mongma aro manderangni gisepo a·sel ong·ani somoirango ta·rake ja·kurangko de·na man·na gita Quick Response Team-ko songna nangengani gimin aganangaha. Ia Quick Response Team-na dingtangmancha mongmarangni gimin aro mongmarangni bewalrangni gimin skie on·enba, mongmarang baksa janggi tangrimani bidingo songni manderangna agan-skie on·china gitaba ua didiangaha.
Bio-fencing-ko dakna gita dingtang dingtang department-rangni gisepo cholrangko sandichina aro MGNREGA baksa bakrimchina ku·pattianiko on·angengon, mongma aro manderangni gisepo a·sel ong·anirangko champengna gita Forest department-ni songe dongimin Voluntary Protection Squad baksa nangrime kam ka·china ua dolni membor-rangko didiangaha.
Ia workshop-ko ong·atanio ERCD-ni Head, Dr Bibhuti P Lahkar, ‘Promotion of Co-existence in Human-Elephant Conflict Hotspots in Northeast India’-ni bidingo agan-talate on·angengon, mongma aro manderangni gisepo chagronggrikani a·sel Meghalaya a·doko sak 30 manderang siangna nangaha aro sak 21 manderang saknaanirangko man·aha ine parakataha.
Da·o mikkang bilsi gittamni gisepo uamang, West aro North Garo Hills a·jarango kamko ka·na sienga ine janapatengon, West Garo Hills a·jao mongma ramaoni sepangbatgipa song dambriko uamang seokaha ine Dr Lahkar parakataha.
Ia workshop-ko ong·atanio dongpae jinmana aganprakanggipa gipin manderangara, ERCD, Aaranyak-ni Manager Dr Alolika Sinha, West Garo Hills-ni Superintendent of Taxes aro Conservationist Bhuto Marak, Tikrikilla C&RD Block-ni BDO Chekame Sangma, Forest (WL & T) Garo Hills Division-ni Conservator SN Sangma, East aro West Garo Hills Wildlife Division-ni DFO Rupankar K Marak aro gipinrang ong·a.
Mongma aro manderangni gisepo a·sel ong·aniko champengna workshop-ko ong·ata
Date:
Share post:
